Ahmedabad: નારોલ-સરખેજ એલિવેટેડ કોરિડોરમાં ગંભીર લોચો એલાઇનમેન્ટ ખોરવાતાં 20 ફૂટ ઊંચો પિલર તોડાયો

અમદાવાદના નારોલથી સરખેજ વચ્ચે રૂપિયા 1,295 કરોડના ખર્ચે બની રહેલા એલિવેટેડ કોરિડોરના બાંધકામને લઈને સોશિયલ મીડિયામાં એક વીડિયો વાઇરલ થવા પામ્યો છે, જેમાં બ્રિજના બાંધકામ દરમિયાન તૈયાર કરવામાં આવેલા પિલરને મશીનથી તોડવામાં આવતો હોવાનું જોવા મળી રહ્યું છે.જોકે, પિલર 15થી 20 ફૂટ જેટલો ઊંચો તૈયાર થઈ ગયા બાદ તેમાં ખામી હોવાનું ધ્યાનમાં આવ્યું હોય તો બાંધકામ દરમિયાન તેની માપણી અને એલાઇનમેન્ટની ચકાસણી કેવી રીતે કરવામાં આવી હતી તે મોટો સવાલ બની રહ્યો છે. પિલર બનાવતાં પહેલાં જ તેનું એલાઇનમેન્ટ અને ડિઝાઇન મુજબનું માપ ચકાસવામાં આવ્યું હતું કે નહીં તે અંગે પણ સ્પષ્ટતા જરૂરી બની છે. પિલર તોડવાની કામગીરી સામે બાંધકામના આયોજન અને ગુણવત્તાની ચકાસણી કરવામાં આવી હતી કે કેમ એ બાબત તપાસ માંગી લે તેવી છે. નારોલ-સરખેજ હાઇવે પર ચાલી રહેલા આ પ્રોજેક્ટની કુલ લંબાઈ 10.63 કિમી છે. કેન્દ્ર સરકારના પ્રોજેક્ટ મોનિટરિંગ રેકોર્ડ મુજબ તેની કિંમત રૂપિયા 1,295 કરોડ છે અને પૂર્ણ કરવાની લક્ષિત તારીખ 15 ફેબ્રુઆરી, 2028 છે. પ્રોજેક્ટમાં હાલના 6-લેન રોડનું અપગ્રેડેશન અને સ્થળની જરૂરિયાત મુજબ એલિવેટેડ કોરિડોરનો સમાવેશ થાય છે.પિલર તોડવાની આ ઘટનાને લઈ પ્રદેશ કોંગ્રેસના એક હોદ્દેદારે કહ્યું હતું કે, '15થી 20 ફૂટ ઊંચો પિલર બની ગયો હતો અને ત્યારબાદ તેને તોડવામાં આવી રહ્યો છે. જ્યારે આટલો મોટો પિલર બની ગયો ત્યારે અધિકારીઓ શું કરતા હતા ?' તેમણે વધુમાં આક્ષેપ કર્યો હતો કે, વિકાસના નામે ચાલી રહેલી કામગીરીમાં સત્તાધીશો અને અધિકારીઓ દ્વારા ઘોર બેદરકારી દાખવવામાં આવી રહી છે અને સમગ્ર મામલો ભ્રષ્ટાચાર તરફ્ ઈશારો કરતો હોવાનું જણાઈ રહ્યું છે.

ગુજરાતના વધુ સમાચાર વાંચવા માટે ક્લિક કરો