Ahmedabadમાં શિપિંગ ધંધામાં રૂ. 3 કરોડની મસમોટી ઠગાઈ અને નિવૃત્ત બેંક મેનેજર સાથે રૂ. 37.80 લાખની છેતરપિંડી!

અમદાવાદ શહેરમાં રોકાણ અને ઊંચા વળતરની લાલચ આપીને નિર્દોષ નાગરિકો તથા વેપારીઓ સાથે લાખો-કરોડો રૂપિયાની ઠગાઈ આચરવાના કિસ્સાઓ અટવાનું નામ નથી ਲੈ રહ્યા. તાજેતરમાં શહેરના અલગ-અલગ વિસ્તારોમાંથી છેતરપિંડીની બે મોટી ઘટનાઓ સામે આવી છે. પ્રથમ ઘટનામાં શિપિંગ બિઝનેસના નામે કરોડોની ઠગાઈ થઈ છે, તો બીજી ઘટનામાં એક નિવૃત્ત બેંક મેનેજરને શેરબજારના ખોટા ટ્રેડિંગમાં ફસાવીને લાખો રૂપિયા પડાવી લેવામાં આવ્યા છે.

શિપિંગ ઈમ્પોર્ટ-એક્સપોર્ટના નામે કોન્ટ્રાક્ટર સાથે રૂ. 3 કરોડની ઠગાઈ, EOW માં ફરિયાદ

પ્રથમ કેસમાં, કોન્ટ્રાક્ટનું કામ કરતા અમદાવાદના વેપારી રોહિત પટેલ ને શિપિંગ અને ઈમ્પોર્ટ-એક્સપોર્ટના ધંધામાં મોટો નફો અપાવવાની લાલચ આપવામાં આવી હતી. જામનગરના સમીર શાહ નામના શખ્સે તેમની પાસેથી જુદા-જુદા પ્રોજેક્ટના નામે કુલ રૂ. 3 કરોડ રૂપિયા ટ્રાન્સફર કરાવી લીધા હતા. સમય મર્યાદા પૂરી થવા છતાં નાણાં કે નફો પરત ન મળતા આખરે પીડિતે અમદાવાદ પોલીસના આર્થિક ગુના નિવારણ સેલ (EOW) માં સમીર શાહ વિરુદ્ધ સંગીન ગુનો દાખલ કરાવ્યો છે.

નિવૃત્ત બેંક મેનેજર સાથે રૂ. 37.80 લાખની છેતરપિંડી

બીજી ઘટનામાં, ચાંદખેડા વિસ્તારમાં રહેતા અને બેંકના નિવૃત્ત મેનેજર સાથે ગંભીર ફ્રોડ થયું છે. આરોપી સતીશ શાહ દ્વારા નિવૃત્ત મેનેજરને શેરબજારમાં રોકાણ કરાવીને માતબર નફો અપાવવાની લોભામણી વાતો કરવામાં આવી હતી. શરૂઆતમાં કુલ રૂ. 46 લાખનું રોકાણ કરાવીને તેમાંથી માત્ર રૂ. 8.25 લાખ પરત આપવામાં આવ્યા હતા અને બાકી રહેલા રૂ. 37.80 લાખ પરત ન આપી આરોપીએ તે નાણાંનો અંગત ઉપયોગ કરી લીધો હતો. આ મામલે ભોગ બનનારે ચાંદખેડા પોલીસ સ્ટેશનમાં સતીશ શાહ વિરુદ્ધ વિશ્વાસઘાત અને ઠગાઈની સત્તાવાર ફરિયાદ નોંધાવી છે.

આ પણ વાંચો : Ahmedabadના પોશ આનંદનગર વિસ્તારમાં તસ્કરોનો આંતક, ફ્લેટનું તાળું તોડી 8.50 લાખ રોકડ અને દાગીના ચોરાયા!