Ahmedabadના દાણીલીમડામાંથી દેશી તમંચા અને 9 જીવતા કારતૂસ સાથે એક ઈસમ ઝડપાયો

અમદાવાદ શહેરના દાણીલીમડા વિસ્તારમાંથી ક્રાઈમ બ્રાન્ચે બિનઅધિકૃત હથિયાર સાથે એક ઈસમની ધરપકડ કરીને મોટી સફળતા મેળવી છે. બાતમીના આધારે પોલીસે દરોડો પાડીને ગેરકાયદેસર શસ્ત્ર સાથે ફરતા ઈસમની અટકાયત કરી છે. આ ઘટનાને પગલે ગેરકાયદેસર હથિયારોની હેરાફેરી કરતા તત્વોમાં ફફડાટ વ્યાપી ગયો છે.

કબીરફાર્મ પાસે જાહેર રોડ પરથી આરોપીની ધરપકડ

ક્રાઈમ બ્રાન્ચની ટીમે ગુપ્ત બાતમીના આધારે દાણીલીમડા સ્થિત કબીરફાર્મ પાસે જાહેર રોડ પર વોચ ગોઠવી હતી. આ દરમિયાન શંકાસ્પદ હાલતમાં જણાતા વેજલપુર વિસ્તારમાં રહેતા સમીરમોહંમદ પ્યારમોહંમદ ખલીફા નામના શખ્સને ઝડપી લેવામાં આવ્યો હતો. આરોપીની પ્રાથમિક પૂછપરછ અને તલાશી લેતાં તેની પાસેથી ગેરકાયદેસર હથિયારો મળી આવ્યા હતા.

આર્મ્સ એક્ટ હેઠળ ગુનો નોંધી તપાસ તેજ

પોલીસે આરોપી પાસેથી 1 નંગ દેશી તમંચો અને 9 નંગ જીવતા કારતૂસ મળીને કુલ રૂ.5,900નો મુદ્દામાલ કબ્જે કર્યો છે. આરોપી વિરુદ્ધ આર્મ્સ એક્ટ હેઠળ ગુનો નોંધીને કાયદેસરની કાર્યવાહી હાથ ધરવામાં આવી છે. આ ગેરકાયદેસર હથિયાર તે ક્યાંથી લાવ્યો હતો અને કોને આપવાનું હતું તે દિશામાં પોલીસે ઊંડાણપૂર્વક તપાસ શરૂ કરી છે.

ગુજરાતના વધુ સમાચાર વાંચવા માટે ક્લિક કરો