Ahmedabadમાં ચોમાસાની શરૂઆતે જ રોગચાળો વકર્યો: ઝાડા-ઉલ્ટીના 96 કેસ નોંધાયા!

અમદાવાદ શહેરમાં વરસાદી માહોલ જામતાની સાથે જ મ્યુનિસિપલ કોર્પોરેશનના ચોપડે પાણીજન્ય રોગચાળાના કેસોમાં ચિંતાજનક ઉછાળો નોંધાયો છે. જુલાઈ મહિનાના માત્ર પ્રથમ સપ્તાહમાં જ શહેરમાં ઝાડા-ઉલ્ટીના 96 જેટલા દર્દીઓ સામે આવ્યા છે. આ ઉપરાંત, દૂષિત પાણી અને ખોરાકના કારણે ફેલાતા કમળાના 9 કેસ અને ટાઈફોઈડના 60 જેટલા કેસો સત્તાવાર રીતે નોંધાતા આરોગ્ય વિભાગ હરકતમાં આવ્યું છે અને સ્થાનીક હોસ્પિટલોમાં પણ દર્દીઓની ભીડ વધી રહી છે.

1300માંથી 4 સેમ્પલ અનફિટ જાહેર

રોગચાળાની ગંભીર સ્થિતિને પગલે કોર્પોરેશનની આરોગ્ય ટીમો દ્વારા વિવિધ વિસ્તારોમાં પાણીના ક્લોરિનેશન અને શુદ્ધતાની ચકાસણી હાથ ધરવામાં આવી છે. તંત્ર દ્વારા લેવાયેલા કુલ 1300 જેટલા પાણીના સેમ્પલમાંથી 4 સેમ્પલ લેબોરેટરી ટેસ્ટિંગમાં અનફિટ એટલે કે પીવા અયોગ્ય સાબિત થયા છે. આ અનફિટ સેમ્પલવાળા વિસ્તારોમાં તાકીદે સુધારાત્મક પગલાં ભરવાની સાથે લોકોને ઉકાળેલું પાણી પીવાની અને બહારની ખુલ્લી વસ્તુઓ ખાવાનું ટાળવાની કડક સૂચનાઓ આપવામાં આવી રહી છે.

ફરિયાદોના આધારે તંત્રનું સઘન ચેકિંગ 

આરોગ્ય વિભાગના સત્તાવાર સૂત્રોના જણાવ્યા અનુસાર, સ્માર્ટ સિટીના કંટ્રોલ રૂમ એટલે કે CCRS (Comprehensive Complaint Redressal System) પોર્ટલ પર નાગરિકો દ્વારા જે વિસ્તારોમાંથી દૂષિત પાણી અથવા ગંદકીની ફરિયાદો મળી રહી છે, ત્યાં પ્રાથમિકતાના ધોરણે તાત્કાલિક ટીમો મોકલીને તપાસ કરવામાં આવી રહી છે. અસરગ્રસ્ત સોસાયટીઓ અને ચાલીઓમાં ક્લોરિનની ગોળીઓનું વિતરણ પણ શરૂ કરાયું છે. તંત્ર આગામી દિવસોમાં ચેકિંગ વધુ કડક બનાવશે જેથી રોગચાળાના ફેલાવાને કાબૂમાં લઈ શકાય.

ગુજરાતના વધુ સમાચાર વાંચવા માટે ક્લિક કરો