Ahmedabad News: ગુરુકુળ રોડ પર સરેઆમ દાદાગીરી, ગાડી ભાડે અને વેચાણ મુદ્દે 20 લોકો વચ્ચે મારામારી!

અમદાવાદ શહેરના પોશ ગણાતા પશ્ચિમ વિસ્તારમાં જાહેરમાં અરાજકતાનો કિસ્સો સામે આવ્યો છે. અમદાવાદ શહેરના વ્યસ્ત એવા ગુરુકુળ રોડ પર જાહેર રસ્તા પર જ બે જૂથો વચ્ચે ઉગ્ર બબાલ અને મારામારી થતાં સ્થાનિકો અને વાહનચાલકોમાં ભય અને ચકચારનો માહોલ સર્જાયો હતો.

ગાડી ભાડે ચઢાવવા અને વેચાણ મુદ્દે વિવાદ

ઘટનાની પ્રાથમિક માહિતી અનુસાર, આ મારામારી ગાડી ભાડે ચઢાવવા અને કાર વેચાણ બાબતે ઊભા થયેલા આંતરિક વિવાદને કારણે થઈ હતી. બોલાચાલીથી શરૂ થયેલો મામલો એટલો ઉગ્ર બન્યો કે બંને પક્ષના લોકો સામસામે આવી ગયા હતા અને જાહેર રસ્તા પર જ એકબીજા પર તૂટી પડ્યા હતા.

રસ્તા પર 20 લોકો વચ્ચે છૂટાહાથની મારામારી

ગુરુકુળ રોડ જેવા ધમધમતા રસ્તા પર આશરે 20 જેટલા યુવકો ભેગા થઈને એકબીજા સાથે કાયદો હાથમાં લઈને મારામારી કરવા લાગ્યા હતા. ધોળા દિવસે જાહેર રોડ પર સર્જાયેલા આ હોબાળાને કારણે થોડીવાર માટે ટ્રાફિક પણ ખોરવાયો હતો અને આસપાસના વેપારીઓ તથા રાહદારીઓ આશ્ચર્યચકિત થઈ ગયા હતા.

પોલીસ ઘટના સ્થળે પહોંચી, તપાસના ચક્રો ગતિમાન

જાહેર રસ્તા પર બબાલ થઈ હોવાની જાણ થતાં જ સ્થાનિક પોલીસનો કાફલો ઘટના સ્થળે દોડી આવ્યો હતો. પોલીસે મામલો શાંત પાડીને સમગ્ર ઘટના અંગે કાયદેસરની તપાસ હાથ ધરી છે. આસપાસના સીસીટીવી ફૂટેજ મેળવીને અસામાજિક તત્વોની ઓળખ કરવાની અને તેમની સામે ગુનો નોંધવાની કાર્યવાહી હાથ ધરવામાં આવી રહી છે.

આ પણ વાંચો: Ahmedabad News: ઓઢવમાં વેપારીનું અપહરણ કરી 34 લાખની લૂંટ, ગાંધીનગર પાસે ફેંકી લૂંટારુઓ ફરાર!