Ahmedabada News: પ્રદૂષિત પાણીની બોટલ સાથે કોંગ્રેસે નોંધાવ્યો વિરોધ, શહેરમાં ટેકસ ભરે છે શહેરીજનો પણ સુવિધાના નામે મીડું

અમદાવાદ શહેર અત્યારે એક તરફ 'સ્માર્ટ સિટી' બનવા તરફ અગ્રેસર છે, ત્યારે બીજી તરફ શહેરના અનેક વિસ્તારોમાં પીવાના શુદ્ધ પાણીના ફાંફા પડી રહ્યા છે. તાજેતરમાં અમદાવાદ શહેર કોંગ્રેસ દ્વારા પીવાના ગંદા અને પ્રદૂષિત પાણીના મુદ્દે મ્યુનિસિપલ કોર્પોરેશનની કચેરીએ ઉગ્ર વિરોધ પ્રદર્શન કરવામાં આવ્યું હતું.

વિરોધનું સ્વરૂપ અને કોંગ્રેસના આક્ષેપો

 આ પ્રદર્શનમાં કોંગ્રેસના શહેર પ્રમુખ, વિરોધ પક્ષના નેતા અને વિવિધ વોર્ડના કાઉન્સિલરો મોટી સંખ્યામાં જોડાયા હતા. કાર્યકરોએ હાથમાં વિરોધ દર્શાવતા પોસ્ટરો અને ગંદા પાણીથી ભરેલી બોટલો સાથે રાખીને તંત્ર સામે સૂત્રોચ્ચાર કર્યા હતા. કોંગ્રેસનો ગંભીર આક્ષેપ છે કે શહેરના અંદાજે 26 જેટલા વિસ્તારોમાં પીવાનું પાણી અત્યંત ગંદુ અને દુર્ગંધયુક્ત આવી રહ્યું છે. આ વિસ્તારોમાં રહેતા હજારો નાગરિકોના સ્વાસ્થ્ય સાથે ચેડાં થઈ રહ્યા હોવાનું કોંગ્રેસે જણાવ્યું હતું.

જનતાના આરોગ્ય પર જોખમ

કોંગ્રેસના નેતાઓએ જણાવ્યું કે, "એક તરફ કોર્પોરેશન મોટા ટેક્સ વસૂલે છે, પરંતુ પ્રાથમિક જરૂરિયાત એવું શુદ્ધ પાણી પૂરું પાડવામાં નિષ્ફળ નીવડ્યું છે." ગંદા પાણીના કારણે ટાઈફોઈડ, કમળો અને કોલેરા જેવા પાણીજન્ય રોગો ફેલાવવાની દહેશત પણ વ્યક્ત કરવામાં આવી છે. જે વિસ્તારોમાં ડ્રેનેજ અને પીવાના પાણીની લાઈનો મિક્સ થઈ રહી છે, ત્યાં તાત્કાલિક રીપેરીંગ કરવાની માંગ ઉઠી છે.

તંત્રને અલ્ટીમેટમ અપાયું

 વિરોધ પ્રદર્શન દરમિયાન કોંગ્રેસે મ્યુનિસિપલ સત્તાધીશોને તે ગંદા પાણીની બોટલો બતાવીને જનતાની હાલાકીનો અહેસાસ કરાવવાનો પ્રયાસ કર્યો હતો. જો આગામી દિવસોમાં આ 26 વિસ્તારોમાં શુદ્ધ પાણીની સમસ્યા હલ કરવામાં નહીં આવે, તો આગામી સમયમાં આંદોલનને વધુ ઉગ્ર બનાવવાની ચીમકી પણ આપવામાં આવી છે.

આ પણ વાંચોઃ Narmada News : રેવાકાંઠા રાજપૂત પરિષદે રચ્યો ઇતિહાસ, સામાજિક એકતાના અવિરત 100 વર્ષ પૂર્ણ