Banaskanthaમાં અમીરગઢ પોલીસે રૂ.1.30 કરોડથી વધુના વિદેશી દારૂ પર ફેરવ્યું બુલડોઝર

બનાસકાંઠા જિલ્લાના અમીરગઢ તાલુકામાં પોલીસે દારૂબંધીના કડક અમલવારીના ભાગરૂપે મોટી કાર્યવાહી હાથ ધરી છે. અમીરગઢ પોલીસ સ્ટેશન દ્વારા વર્ષ 2026 દરમિયાન અલગ-અલગ દરોડા અને ચેકિંગ દરમિયાન પકડવામાં આવેલા 44 જેટલા ગુનાઓનો ગેરકાયદેસર વિદેશી દારૂનો જથ્થો નાશ કરવામાં આવ્યો હતો. પોલીસે કુલ 37,711 બોટલો, જેની અંદાજિત કિંમત રૂપિયા 1 કરોડ 30 લાખથી પણ વધુ થવા જાય છે, તેના પર રોલર ફેરવીને સંપૂર્ણ જથ્થાનો ખાતમો બોલાવ્યો હતો.

ઉચ્ચ અધિકારીઓની હાજરીમાં કાયદેસરની પ્રક્રિયા પૂર્ણ કરાઈ 

આ દારૂના જથ્થાના નાશની કામગીરી નિશ્ચિત કરવામાં આવેલા સ્થળે સરકારી નિયમોનુસાર હાથ ધરવામાં આવી હતી. આ તકે અમીરગઢ પોલીસ સ્ટેશનના પી.આઈ. (PI), એસ.ડી.એમ. (SDM) અને ડી.વાય.એસ.પી. (DySP) સહિતના ઉચ્ચ પ્રશાસનિક અને પોલીસ અધિકારીઓની પ્રત્યક્ષ હાજરી રહી હતી. અધિકારીઓની સમક્ષ કરોડો રૂપિયાની કિંમતના દારૂના બોક્સ પર બુલડોઝર ફેરવીને પારદર્શક રીતે નાશ કરવાની પ્રક્રિયા પૂર્ણ કરવામાં આવી હતી.

બુટલેગરોમાં ફફડાટ, અમીરગઢ પોલીસની બાઝ નજર 

સરહદી વિસ્તાર ગણાતા અમીરગઢ પંથકમાં અસામાજિક પ્રવૃત્તિઓ અને દારૂની હેરાફેરી રોકવા માટે પોલીસ તંત્ર સંપૂર્ણ એલર્ટ મોડ પર છે. ગુનાખોરી અને બુટલેગરો પર પોલીસની બાઝ નજર હોવાથી અન્ય રાજ્યોમાંથી ઘૂસાડાતા ગેરકાયદેસર જથ્થાને સતત ઝડપી પાડવામાં આવી રહ્યો છે. પોલીસની આ આકરી અને મોટા પાયે કરાયેલી કાર્યવાહીથી બુટલેગરો અને અસામાજિક તત્વોમાં ભારે ફફડાટ વ્યાપી ગયો છે.

ગુજરાતના વધુ સમાચાર વાંચવા માટે ક્લિક કરો