Bangladesh: ભગવાન રામનું અપમાન, હિંદુ સમુદાયે વિરોધે..ભારતે બાંગ્લાદેશ સરકારને લગાવી ફટકાર

બાંગ્લાદેશમાં હિંદુઓ પ્રત્યે થઇ રહેલા અત્યાચાર તથા હવે તો દેવી દેવતાઓનું પણ અપમાન થતા બાંગ્લાદેશમાં રહેતા હિંદુ સમુદાય આકરા પાણીએ જોવા મળ્યો છે. આ અંગે ભારત સરકારે પણ નોંધ લીધી છે. 

બાંગ્લાદેશમાં ભગવાન રામનુ અપમાન !

મહત્વનું છે કે ગાયબંધામાં, ભગવાન રામ પ્રત્યે દર્શાવવામાં આવેલા અનાદર સામે હિન્દુ સમુદાયે મોટા પાયે વિરોધ પ્રદર્શન કરવામાં આવ્યું હતું. તેના જવાબમાં, ભારતે બાંગ્લાદેશી સરકારને સખત ઠપકો આપ્યો અને ધાર્મિક લઘુમતીઓની સુરક્ષા સુનિશ્ચિત કરવા વિનંતી કરી. તેઓએ કહ્યું કે  અમે બાંગ્લાદેશમાંથી એવા અહેવાલો જોયા છે કે હિન્દુ દેવતાઓના ચિત્રો સાથે અપવિત્ર કૃત્યો થયા છે..અમારી આશા છે કે બાંગ્લાદેશ સરકાર ઉગ્રવાદી જૂથોને રોકશે અને લઘુમતીઓના રક્ષણની ખાતરી આપશે.

બાંગ્લાદેશમાં રામની પ્રતિમા નિર્માણને અટકાવ્યું 

પડોશી બાંગ્લાદેશમાં તારિક રહેમાનના નેતૃત્વમાં નવી સરકારની રચના બાદ એવી અપેક્ષાઓ હતી કે ઇસ્લામિક કટ્ટરપંથીઓ પર કડક કાર્યવાહી કરવામાં આવશે. જો કે  તેમ થયુ નહીં.  તેના બદલે, આ જૂથો દ્વારા લાદવામાં આવેલું દબાણ વધુ તીવ્ર બન્યું છે. ગાયબંધામાં ભગવાન રામની 81 ફૂટ ઊંચી પ્રતિમાના નિર્માણને અટકાવવાથી આ સ્પષ્ટ થાય છે. માનવાધિકાર સંગઠન JMBF એ આ પગલા પર ચિંતા વ્યક્ત કરતા આરોપ લગાવ્યો કે સરકારનો નિર્ણય ઇસ્લામિક કટ્ટરપંથી જૂથોના દબાણ હેઠળ લેવામાં આવ્યો છે.

હિંદુ સમુદાય રસ્તા પર ઉતરી આવ્યો 

વિરોધમાં, સ્થાનિક હિન્દુ સમુદાય રસ્તાઓ પર ઉતરી આવ્યો, મોટા પાયે પ્રદર્શનો કર્યા. જ્વલંત મશાલો લઈને, તેઓએ તેમની ધાર્મિક લાગણીઓ પર હુમલો માનીને તેની નિંદા કરી. પરિસ્થિતિને ધ્યાનમાં રાખીને, ભારત સરકારે મંગળવારે બાંગ્લાદેશી સરકાર પાસેથી કડક પગલાં લેવાની માંગ કરી હતી. વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે ભારત બાંગ્લાદેશી સરકાર પાસેથી કટ્ટરપંથીઓ પર લગામ લગાવવાની અને હિન્દુ લઘુમતીઓની સંપૂર્ણ સલામતી સુનિશ્ચિત કરવાની સંપૂર્ણ અપેક્ષા રાખે છે.

પ્રતિમાનું બાંધકામ 12 જૂને બંધ કરાયુ 

માનવાધિકાર સંગઠન 'જસ્ટિસ મેકર્સ બાંગ્લાદેશ ઇન ફ્રાન્સ' અનુસાર, આ મહિનાની શરૂઆતમાં મંદિરમાં પ્રતિમાના નિર્માણના સમાચાર સામે આવતાની સાથે જ સ્થાનિક ઇસ્લામિક સંગઠનોએ આ પ્રોજેક્ટનો ઉગ્ર વિરોધ કર્યો હતો. રેલીઓ યોજાઈ હતી, પ્રેસ કોન્ફરન્સ કરવામાં આવી હતી અને સરકારી અધિકારીઓને ઔપચારિક ફરિયાદો રજૂ કરવામાં આવી હતી. તણાવ વધવા અને સંભવિત હિંસાના ડરથી, મંદિર વહીવટીતંત્રે 12 જૂને બાંધકામ કાર્ય અટકાવી દીધું હતું.

ઉલ્લેખનીય છે કે બાંગ્લાદેશમાં ધાર્મિક લઘુમતીઓને વારંવાર નિશાન બનાવવામાં આવી રહ્યા છે.  બાંગ્લાદેશમાં અશાંતિ અને રાજકીય અસ્થિરતા વચ્ચે, ભારતે બાંગ્લાદેશમાં હિન્દુઓ અને અન્ય લઘુમતી સમુદાયોની સલામતી અંગે વારંવાર ચિંતા વ્યક્ત કરી છે. તેમ છતાં, પરિસ્થિતિમાં કોઈ સુધારો થયો નથી.  આ ઘટના બાંગ્લાદેશના પોતાના બંધારણ અને વૈશ્વિક માનવાધિકાર ધોરણોની વિરુદ્ધ છે. સંગઠને સરકાર દ્વારા સમગ્ર મામલાની નિષ્પક્ષ તપાસની માંગ કરી છે.