Bharuchના વાગરામાં પતિ-પત્ની અને પ્રેમીના ત્રિકોણીય વિવાદમાં 27 વર્ષીય યુવકની હત્યા!

ભરૂચ જિલ્લાના વાગરા તાલુકાના પહાજ ગામમાં પ્રેમ પ્રકરણના વિવાદે અત્યંત ભયાનક અને લોહિયાળ રૂપ ધારણ કર્યું છે. પતિ, પત્ની અને પ્રેમીના ત્રિકોણીય કિસ્સામાં 27 વર્ષીય યુવક વસીમભાઈ ઇકબાલ દિવાનની નિર્મમ હત્યા કરવામાં આવી છે. રાત્રિના સમયે વરસાદ અને વીજળી ગુલ હોવાના કારણે ફેલાયેલા અંધારાનો લાભ લઈને વસીમ પર ઘાતક હુમલો કરવામાં આવ્યો હતો, જેમાં તે લોહીલુહાણ હાલતમાં ઢળી પડ્યો હતો.

સારવાર દરમિયાન યુવકનું મોત અને પરિવારમાં શોક 

ઈજાગ્રસ્ત વસીમને સ્થાનિકો અને મિત્રો દ્વારા તાત્કાલિક સારવાર અર્થે પ્રથમ વાગરા, ત્યારબાદ ભરૂચ અને વધુ ગંભીર હાલત હોવાથી વડોદરા હોસ્પિટલ ખસેડવામાં આવ્યો હતો. જોકે, તબીબોની તમામ કોશિશો છતાં સારવાર દરમિયાન વસીમે દમ તોડ્યો હતો. 27 વર્ષીય યુવાનના અચાનક મોતથી પરિવાર પર આભ તૂટી પડ્યું છે અને સમગ્ર પહાજ ગામમાં શોક તેમજ આક્રોશની કાળી ડિબંગ છાયા ફરી વળી છે.

વાગરા પોલીસની ત્વરિત કાર્યવાહી અને કાયદાકીય કલમો 

બનાવની ગંભીરતાને ધ્યાનમાં રાખીને વાગરા પોલીસે ગુનો નોંધી ગણતરીના કલાકોમાં જ મુખ્ય આરોપી આસિફ મહંમદ પટેલની ધરપકડ કરી લીધી છે. આરોપી સામે ભારતીય ન્યાય સંહિતા-2023ની કલમ 103(1), 109(1) અને ગુજરાત પોલીસ અધિનિયમની કલમ 135 હેઠળ કાર્યવાહી કરવામાં આવી છે. ઘટનાસ્થળે રી-કન્સ્ટ્રક્શન કામગીરી દરમિયાન પરિવાર અને પોલીસ વચ્ચે થયેલી ઘર્ષણની સ્થિતિ બાદ પરિવારે પોલીસની માફી માંગી તેમની ઝડપી કામગીરીને બિરદાવી હતી. હાલ વસીમનો પરિવાર આરોપી સામે કડકમાં કડક કાયદાકીય કાર્યવાહી કરી ન્યાય અપાવવાની માંગ કરી રહ્યો છે.

ગુજરાતના વધુ સમાચાર વાંચવા માટે ક્લિક કરો