Bharuch News: બેંક કર્મચારીઓની હડતાળ, કાળા કપડાં પહેરી 5-ડે બેંકિંગની માગ સાથે વિરોધ

ભરૂચ શહેરમાં આજે બેંક કર્મચારીઓ પોતાની વિવિધ પડતર માંગણીઓને લઈને આક્રમક મોડમાં જોવા મળ્યા હતા. અખિલ ભારતીય સ્તરે અપાયેલા આહ્વાનના ભાગરૂપે ભરૂચના સ્ટેશન રોડ પર આવેલી બેંક ઓફ બરોડાની મુખ્ય શાખા ખાતે મોટી સંખ્યામાં બેંક કર્મચારીઓ એકઠા થયા હતા. વિરોધને વધુ અસરકારક બનાવવા માટે તમામ કર્મચારીઓ કાળા કપડાં પહેરીને આવ્યા હતા અને બેંકિંગ ક્ષેત્રના કર્મચારીઓના અધિકારો માટે અવાજ ઉઠાવ્યો હતો.

સૂત્રોચ્ચારથી ગુંજી ઉઠ્યું પરિસર, 5-ડે બેંકિંગ સહિતની માંગણીઓ દોહરાવાઈ

એકત્ર થયેલા બેંક કર્મચારીઓએ પોતાની ન્યાયિક માંગણીઓના સમર્થનમાં જોરદાર સૂત્રોચ્ચાર કરીને વિરોધ નોંધાવ્યો હતો. આ વિરોધ પ્રદર્શનનું મુખ્ય પાસું બેંકિંગ સેક્ટરમાં સપ્તાહમાં 5-ડે બેંકિંગ (પાંચ દિવસનું કામકાજ) અમલી બનાવવાનું છે. આ ઉપરાંત વેતન સુધારો, પેન્શન યોજનામાં સુધારા અને અન્ય પડતર પ્રશ્નોનો ઉકેલ લાવવા માટે કર્મચારીઓએ એકસૂરે તંત્ર પાસે માંગ કરી હતી.

બેંકિંગ કામગીરી પર માઠી અસર, ગ્રાહકો હેરાન-પરેશાન

કર્મચારીઓની આ હડતાળના કારણે ભરૂચ શહેરમાં બેંકિંગ સેવાઓ પર સીધી વિપરીત અસર જોવા મળી હતી. બેંકોમાં કેશ કાઉન્ટર, ચેક ક્લિયરિંગ અને અન્ય રોજિંદી કામગીરી સંપૂર્ણપણે ઠપ્પ થઈ જતાં સામાન્ય નાગરિકો તેમજ વેપારીઓને ભારે મુશ્કેલીનો સામનો કરવો પડ્યો હતો.

કર્મચારીઓએ સ્પષ્ટ ચેતવણી આપી છે કે, જો તેમની માંગણીઓ વહેલી તકે સ્વીકારવામાં નહીં આવે તો આગામી દિવસોમાં આંદોલન વધુ તેજ બનાવવામાં આવશે.

આ પણ વાંચો: Bharuch News: અંકલેશ્વરમાં 10.34 લાખનો શંકાસ્પદ કેમિકલનો જથ્થો ઝડપાયો, 2 ની ધરપકડ