Bhavnagarમાં ધોરણ-8ની વિદ્યાર્થિનીના નામે નકલી લવ લેટર વાયરલ, શાળા અને ટ્યુશન ક્લાસમાં ખળભળાટથી ભારે રોષ!

ભાવનગર શહેરમાં શિક્ષણ જગતને શરમાવે અને હચમચાવી નાખે તેવી એક અત્યંત ગંભીર ઘટના સામે આવી છે. અહીં એક પ્રતિષ્ઠિત શાળામાં અભ્યાસ કરતી ધોરણ-8ની સગીર વિદ્યાર્થિનીના નામે કોઈ શખ્સો દ્વારા એક નકલી લવ લેટર તૈયાર કરીને વાયરલ કરવામાં આવ્યો છે. આ પત્ર માત્ર શાળામાં જ નહીં પરંતુ ટ્યુશન ક્લાસિસમાં પણ વહેતો કરવામાં આવતા ભારે ચકચાર મચી ગઈ છે. આ કાવતરાને કારણે માસૂમ વિદ્યાર્થિની અને તેના પરિવારજનોને ભારે માનસિક ત્રાસ અને શરમજનક પરિસ્થિતિનો સામનો કરવો પડી રહ્યો છે.

આરોપી વિદ્યાર્થીઓને માત્ર 3 દિવસની સજા અપતા વાલીઓમાં ભારે રોષ

ઘટના સામે આવ્યા બાદ શાળા સંચાલકો દ્વારા પ્રાથમિક તબક્કે આ કૃત્ય કરનાર વિદ્યાર્થીઓને માત્ર 3 દિવસની સજા ફટકારવામાં આવી હતી. જોકે, આ નજીવી સજા સામે વાલીઓમાં અને સ્થાનિક સ્તરે ભારે રોષ ભભૂકી ઉઠ્યો છે. લોકોનો આક્ષેપ છે કે સગીરાને માનસિક રીતે તોડવાના આ ગંભીર કૃત્યમાં માત્ર થોડા દિવસોની સજા અપૂરતી છે અને ગુનેગારોને છાવરવામાં આવી રહ્યા છે. આ મામલે વાલીઓ દ્વારા કડક શિસ્તભંગના પગલાં લેવાની ઉગ્ર માંગ કરવામાં આવી છે.

શાળા સંચાલકો દ્વારા તપાસ કમિટીની રચના

વિવાદ વધતો જોઈને શાળા સંચાલક મંડળ અને આચાર્ય દ્વારા આ સમગ્ર મામલાની ગંભીરતાને ધ્યાનમાં રાખીને એક ખાસ તપાસ કમિટી (Investigation Committee) ની રચના કરવામાં આવી છે. કમિટી દ્વારા સ્કૂલ અને ટ્યુશન ક્લાસના વિદ્યાર્થીઓની પૂછપરછ તેમજ ટેક્નિકલ પાસાઓની તપાસ શરૂ કરવામાં આવી છે. શાળા સત્તાધીશોએ ખાતરી આપી છે કે તપાસનો અંતિમ રિપોર્ટ આવ્યા બાદ જે કોઈ પણ દોષિત સાબિત થશે તેની સામે કાયદાકીય અને કડક શૈક્ષણિક પગલાં લેવામાં આવશે.

આ પણ વાંચો : Viramgam રૂરલ પોલીસ મથક બહાર લોકોનાં ઉમટ્યાં ટોળાં, પોલીસ કસ્ટડીમાં મારપીટ થઈ હોવાની ફરિયાદથી ભારે હોબાળો