Bhavnagar News: આત્મનિર્ભર હણોલ મહોત્સવ; 13મી જાન્યુઆરીથી મહાનુભાવોની ઉપસ્થિતિમાં વિકાસ અને સંસ્કૃતિનો ત્રિવેણી સંગમ

પાલિતાણા તાલુકાના હણોલ ગામે આગામી તા. 13 થી 15 જાન્યુઆરી દરમિયાન 'આત્મનિર્ભર હણોલ મહોત્સવ-2026'નું ભવ્ય આયોજન કરવામાં આવ્યું છે. ગ્રામીણ વિકાસ, સ્વાવલંબન અને જનસહભાગિતાના ઉમદા ઉદ્દેશ્ય સાથે યોજાનાર આ ત્રણ દિવસીય ઉત્સવમાં દેશ અને રાજ્યની અનેક નામાંકિત હસ્તીઓ ઉપસ્થિત રહેશે.

કેન્દ્રીય મંત્રીઓ અને દિગ્ગજ ખેલાડીઓની હાજરી

મહોત્સવના પ્રથમ દિવસે કેન્દ્રીય કૃષિ મંત્રી શિવરાજસિંહ ચૌહાણ, ડૉ. મનસુખ માંડવિયા, ઇન્ડિયન ઓલિમ્પિક એસોસિએશનના પ્રેસિડન્ટ પી.ટી. ઉષા તેમજ રાજ્યના મંત્રીઓ જીતુભાઈ વાઘાણી અને કુંવરજીભાઈ બાવળિયાની ઉપસ્થિતિમાં કાર્યક્રમનું ઉદ્ઘાટન કરવામાં આવશે. આ ઉપરાંત, ભારતીય ક્રિકેટ ટીમના પૂર્વ કેપ્ટન કપિલ દેવ, ઝોહોના સ્થાપક શ્રીધર વેમ્બુ અને અભિનેતા અરુણ ગોવિલ પણ મહોત્સવની શોભા વધારશે.

રાજ્યપાલ આચાર્ય દેવવ્રતનું વિશેષ પ્રદાન

ગુજરાતના રાજ્યપાલ આચાર્ય દેવવ્રત આ મહોત્સવ દરમિયાન હણોલ ગામે રાત્રિ રોકાણ કરશે. તેઓ પ્રાકૃતિક ખેતી અંગે ખેડૂતોને માર્ગદર્શન આપશે તેમજ પ્રભાત ફેરી અને ગ્રામ સફાઈ અભિયાનમાં જોડાઈને સ્વચ્છતાનો સંદેશ આપશે.

મહોત્સવના મુખ્ય આકર્ષણો

કૃષિ અને ટેકનોલોજી: પ્રાકૃતિક ખેતી અને ટેકનોલોજી આધારિત પ્રદર્શનો. યુવા શક્તિ: રોજગાર અને રમતગમત લક્ષી પરિસંવાદો. વિકાસલક્ષી કામો: વિવિધ વિકાસલક્ષી પ્રવૃત્તિઓનું લોકાર્પણ. આ મહોત્સવ ગ્રામીણ ભારતને આત્મનિર્ભર બનાવવાની દિશામાં એક મહત્વનું પગલું સાબિત થશે. આયોજકો દ્વારા આ ઐતિહાસિક મહોત્સવમાં મોટી સંખ્યામાં લોકોને જોડાવા ભાવભર્યું આમંત્રણ પાઠવવામાં આવ્યું છે.

ગુજરાતના વધુ સમાચાર વાંચવા માટે ક્લિક કરો