Bhavnagar: સરતાનપર વાવડીમાં SOGના દરોડા, 1.22 કિલો ગાંજા સાથે એક યુવકને દબોચ્યો

ભાવનગર શહેર અને જિલ્લામાં નશાબંધીના અમલ માટે પોલીસ દ્વારા સતત ઝુંબેશ ચલાવવામાં આવી રહી છે. આ દરમિયાન ભાવનગર SOG (સ્પેશિયલ ઓપરેશન ગ્રુપ)ની ટીમને મળેલી ચોક્કસ બાતમીના આધારે સરતાનપર વાવડી વિસ્તારમાં દરોડા પાડીને ગાંજાના જથ્થા સાથે એક શખ્સને ઝડપી પાડવામાં સફળતા મળી છે.

સરતાનપર વાવડી વિસ્તારમાં દરોડા

SOGની ટીમને માહિતી મળી હતી કે સરતાનપર વાવડીના વાડી વિસ્તારમાં એક યુવક નશીલા પદાર્થ સાથે હાજર છે. પોલીસે ત્વરિત કાર્યવાહી કરતા વોચ ગોઠવીને મુકેશભાઈ ગોંડલીયા નામના યુવાનની અટકાયત કરી હતી. તેની તલાશી લેતા તેની પાસેથી અંદાજે 1.223 કિલોગ્રામ ગાંજો મળી આવ્યો હતો.

કુલ મુદ્દામાલની જપ્તી

પોલીસે આરોપી પાસેથી ગાંજાનો જથ્થો અને અન્ય ચીજવસ્તુઓ મળી કુલ રૂપિયા 63,000 થી વધુની કિંમતનો મુદ્દામાલ કબજે કર્યો છે. આરોપી સામે NDPS એક્ટ હેઠળ ગુનો નોંધીને કાયદેસરની કાર્યવાહી હાથ ધરવામાં આવી છે.

સુરત કનેક્શન ખુલ્યું

પોલીસની પ્રાથમિક પૂછપરછમાં ચોંકાવનારો ખુલાસો થયો છે. આરોપી મુકેશને ગાંજાના સેવનની લત હોવાથી તે આ જથ્થો સુરતથી લાવ્યો હોવાનું કબૂલ્યું છે. પોતે નશો કરવા માટે આટલી મોટી માત્રામાં ગાંજો લાવ્યો હતો કે પછી તેની પાછળ અન્ય કોઈ વેચાણનો ઈરાદો હતો, તે દિશામાં SOG પોલીસ વધુ તપાસ ચલાવી રહી છે. આ ઘટનાને પગલે નશાના સોદાગરોમાં ફફડાટ વ્યાપી ગયો છે.

આ પણ વાંચો: Junagadh: જેલમાં ટીવી સેટઅપ બોક્સમાંથી મોબાઈલ-સિમકાર્ડ ઝડપાયા, ત્રણ કેદીઓ સામે ફરિયાદ