Chardham yatra 2026: ખરાબ હવામાનને કારણે ચારધામ યાત્રા સ્થગિત, બે દિવસની રોક

ચાર ધામ યાત્રા હાલ પુરતી સ્થગિત કરવામાં આવી છે. ખરાબ હવામાનને કારણે યાત્રા સ્થગિત કરવામાં આવી છે. બે દિવસ યાત્રા પર રોક રહેશે.  વરસાદનું રેડએલર્ટ હોવાને કારણે આ નિર્ણય લેવાયો છે. 

27 સપ્ટેમ્બર સુધી રોક 

હવામાન વિભાગની ચેતવણીઓ અને ખરાબ હવામાનની શક્યતાને ધ્યાનમાં રાખીને, વહીવટીતંત્રે ચાર ધામ યાત્રા કામચલાઉ ધોરણે સ્થગિત કરી દીધી છે. યાત્રાળુઓની સુરક્ષાને પ્રાથમિકતા આપીને, આજ બપોરથી 27 સપ્ટેમ્બર સુધી આ યાત્રા અટકાવવાનો નિર્ણય લેવામાં આવ્યો છે.

વહીવટીતંત્રના જણાવ્યા અનુસાર, હવામાનની સ્થિતિની સમીક્ષા કર્યા બાદ ચાર ધામના માર્ગો પર યાત્રાળુઓની અવરજવર અટકાવવાનો નિર્ણય લેવામાં આવ્યો છે. સતત બદલાતા હવામાન અને વરસાદની આગાહીને જોતાં સત્તાવાળાઓ કોઈ પણ પ્રકારનું જોખમ લેવા માંગતા નથી.

ઋષિકેશ અને આસપાસના વિસ્તારોમાં યાત્રાળુઓને ધીરજ રાખવાની અપીલ 

આ સ્થગિત સમયગાળા દરમિયાન, સંબંધિત વિભાગોને માર્ગોની સ્થિતિ પર સતત નજર રાખવા સૂચના આપવામાં આવી છે. વહીવટીતંત્રે ઋષિકેશ અને આસપાસના વિસ્તારોમાં હાલમાં રહેલા યાત્રાળુઓને ધીરજ રાખવા અને યાત્રા ફરી શરૂ કરવા અંગેની સત્તાવાર જાહેરાતની રાહ જોવા અપીલ કરી છે.

વહીવટીતંત્ર હવામાનની સ્થિતિની સતત સમીક્ષા કરી રહ્યું છે. હવામાનમાં સુધારો થયા બાદ અને મુસાફરીના માર્ગો સુરક્ષિત હોવાનું જણાશે ત્યારે જ ચાર ધામ યાત્રા ફરી શરૂ કરવાનો નિર્ણય લેવામાં આવશે.