Chhota Udaipur News: વિદ્યાના ધામમાં લાફાકાંડ, નસવાડીની શાળામાં મહિલા આચાર્યને શિક્ષિકાએ લગાવી બે ધોલ!

છોટાઉદેપુર જિલ્લાના નસવાડી ટાઉનમાં આવેલી સ્ટેશન શાળામાં શિક્ષણ જગતને શરમાવે તેવી એક ચોંકાવનારી ઘટના સામે આવી છે. જ્યાં વિદ્યાના ધામ સમાન શાળા પરિસરમાં જ મહિલા આચાર્ય અને શિક્ષિકા વચ્ચે કોઈ બાબતે ભારે બોલાચાલી અને કકળાટ સર્જાયો હતો. આ બાબત એટલી હદે વણસી ગઈ કે શાળાનું વાતાવરણ તંગ બની ગયું હતું.

ઉગ્ર વિવાદ બાદ આચાર્યને બે લાફા માર્યાનો આક્ષેપ

મળતી માહિતી મુજબ, નસવાડી સ્ટેશન શાળામાં ફરજ બજાવતા મહિલા આચાર્ય અને શિક્ષિકા વચ્ચે સામાન્ય વાતમાં વિવાદ શરૂ થયો હતો. આ વિવાદ દરમિયાન આવેશમાં આવી ગયેલી શિક્ષિકાએ મહિલા આચાર્યને બે લાફા મારી દીધા હોવાનો ગંભીર આક્ષેપ કરવામાં આવ્યો છે. શાળા સમય દરમિયાન જ બનેલી આ ઘટનાને પગલે અન્ય સ્ટાફ તેમજ વિદ્યાર્થીઓમાં ભારે અફરાતફરી અને આશ્ચર્યનો માહોલ સર્જાયો હતો.

112 પોલીસ ઘટના સ્થળે દોડી આવી, તપાસ શરૂ

ઘટના અંગે તાત્કાલિક કંટ્રોલ રૂમને જાણ કરવામાં આવતા 112 પોલીસની ટીમ તુરંત જ નસવાડી સ્ટેશન શાળા ખાતે પહોંચી ગઈ હતી. સ્થળ પર પહોંચેલી પોલીસે પરિસ્થિતિ પર કાબૂ મેળવ્યો હતો અને આક્ષેપિત શિક્ષિકાને પોતાની સાથે પોલીસ વાહનમાં બેસાડીને લઈ ગઈ હતી. બીજી તરફ, લાફા ખાનાર પીડિત મહિલા આચાર્ય પણ નસવાડી પોલીસ સ્ટેશને પહોંચ્યા હતા અને સમગ્ર મામલે લેખિત રજૂઆત કરી કાયદેસરની કાર્યવાહી કરવાની માગ કરી છે.

આ પણ વાંચો: Chhota Udaipur : કવાંટ મામલતદાર કચેરી ખાતે સેવા સેતુ કાર્યક્રમમાં લાભાર્થીઓ ઊમટયાં