Gandhinagar : કલેક્ટરે 6 રાજ્યોના યુવાનોને લીડરશીપ અંડર પ્રેસરના પાઠ ભણાવ્યા

ગાંધીનગર ખાતે વંદે માતરમ કેમ્પ અંતર્ગત આજે યુવા સંવાદ કાર્યક્રમનું વિશેષ આયોજન કરવામાં આવ્યું હતું. આ કાર્યક્રમમાં દેશના અલગ-અલગ છ રાજ્યોમાંથી આવેલા યુવા સહભાગીઓએ ભાગ લીધો હતો. કાર્યક્રમના મુખ્ય વક્તા તરીકે ગાંધીનગરના જિલ્લા કલેક્ટર રવિન્દ્ર ખતાલે ઉપસ્થિત રહ્યા હતા. તેમણે યુવાનો સાથે દબાણ હેઠળ નેતૃત્વઃ નિર્ણયશક્તિ, અખંડિતતા અને કટોકટી સંચાલન વિષય પર ઊંડાણપૂર્વક સાર્થકચર્ચા કરી હતી. સંવાદ સત્ર દરમિયાન યુવાનોએ કલેક્ટરની દૈનિક કાર્યશૈલી, કટોકટીના સમયમાં નિર્ણયો કેવી રીતે લેવાય છે અને આપાતકાલીન પરિસ્થિતિઓમાં પ્રાથમિકતાઓ કેવી રીતે નક્કી થાય છે તે અંગે સવાલો પૂછયા હતા. જેના જવાબો આપવા સાથે કલેક્ટરે વહીવટીતંત્ર, નોકરશાહી, સુશાસન અને શાસનમાં યુવાનોની ભૂમિકા વિશે માર્ગદર્શન આપ્યું હતું. આ ઉપરાંત તેમણે યુપીએસસી સિવિલ સેવા પરીક્ષાની તૈયારી માટેની યોગ્ય રણનીતિઓ પણ યુવાનો સમક્ષ રજૂ કરી હતી. આ કાર્યક્રમમાં મેરા યુવા ભારત ગુજરાતના રાજ્ય નિયામક સચિન શર્મા અને ગાંધીનગરના જિલ્લા યુવા અધિકારી વર્ષા રોઘા ઉપસ્થિત રહ્યા હતા.

ગુજરાતના વધુ સમાચાર વાંચવા માટે ક્લિક કરો