Gandhinagar : રાજ્યની તિજોરી છલકાઈ, GST આવકમાં 44%નો તોતિંગ ઉછાળો, એપ્રિલમાં નોંધાઈ અત્યાર સુધીની સૌથી વધુ આવક

ગુજરાત રાજ્યએ આર્થિક ક્ષેત્રે એક નવી ઊંચાઈ સર કરી છે. GSTના અમલીકરણ બાદ એપ્રિલ 2026ના મહિનામાં રાજ્યની આવકમાં અભૂતપૂર્વ વધારો જોવા મળ્યો છે. સત્તાવાર આંકડાઓ અનુસાર, માત્ર GST પેટે જ રાજ્યને ₹૯,૯૧૬ કરોડની આવક થઈ છે, જે ગત વર્ષના એપ્રિલ મહિનાની ₹૬,૯૦૧ કરોડની આવક સામે ૪૪%નો તોતિંગ વધારો દર્શાવે છે.

રાષ્ટ્રીય સરેરાશ કરતા ગુજરાતનો ગ્રોથ અનેકગણો વધુ

જ્યાં રાષ્ટ્રીય સ્તરે GST ગ્રોથ ૮.૭% રહ્યો છે, તેની સામે ગુજરાતનો ૪૪% ગ્રોથ રાજ્યની મજબૂત આર્થિક ગતિવિધિઓ અને વેપાર ઉદ્યોગની તેજીની સાક્ષી પૂરે છે. એપ્રિલ ૨૦૨૬માં નોંધાયેલી આ આવક GSTના ઇતિહાસમાં અત્યાર સુધીની સૌથી ઊંચી માસિક આવક છે.

વેટ અને અન્ય વેરામાં પણ ઉછાળો

માત્ર GST જ નહીં, પરંતુ વેટ (VAT), વિદ્યુત શુલ્ક અને અન્ય વેરાઓ મળીને રાજ્યની કુલ આવક ₹૧૩,૭૦૩ કરોડ પર પહોંચી છે. જેમાં વેટ હેઠળ ₹૨,૭૧૧ કરોડ અને વિદ્યુત શુલ્ક પેટે ₹૧,૦૫૫ કરોડની આવક નોંધાઈ છે. નિષ્ણાતોના મતે, વહીવટી પારદર્શિતા અને વેપારીઓ દ્વારા નિયમિત ટેક્સ ચુકવણીને કારણે આ ઐતિહાસિક સિદ્ધિ હાંસલ થઈ છે.

આ પણ વાંચો----     Bhavnagar : સોની દંપતી હત્યા કેસમાં મોટો ખુલાસો, શ્રવણ બન્યો કસાઈ, પત્ની સાથે મળી માતા પિતાની હત્યા કરી