Gandhinagar News : ગરબાની તકરાર લોહિયાળ બની, અરવિંદસિંહ ચાવડા પર 3 રાઉન્ડ ફાયરિંગ, 8 શખ્સો સામે ફરિયાદ નોંધાઈ

ગાંધીનગર જિલ્લાના માણસા તાલુકામાં આવેલા વરસોડા ગામમાં કાયદો અને વ્યવસ્થાની સ્થિતિ વણસી હોય તેવી એક ગંભીર અને ચોંકાવનારી ઘટના સામે આવી છે. ગામમાં રહેતા અરવિંદસિંહ ચાવડા નામના ખેડૂત પર જૂની તકરારનો ખાર રાખીને કેટલાક માથાભારે તત્વો દ્વારા અચાનક ફાયરિંગ કરવામાં આવ્યું હતું. આ બનાવના કારણે શાંત ગણાતા વરસોડા ગામ સહિત સમગ્ર માણસા પંથકમાં ભારે સન્નાટો અને દહેશતનો માહોલ વ્યાપી ગયો છે.

ગરબાના સાઉન્ડ સિસ્ટમનો વિવાદ

મળતી પ્રાથમિક વિગતો અનુસાર, અગાઉ નવરાત્રી દરમિયાન ગરબામાં સાઉન્ડ સિસ્ટમ વગાડવા મુદ્દે અરવિંદસિંહ ચાવડાને સ્થાનિક કેટલાક લોકો સાથે બોલાચાલી અને જૂની અદાવત ચાલી રહી હતી. આ જ વિવાદનું વેર રાખીને 8 જેટલા શખ્સો ઘાતક હથિયારો સાથે એકસંપ થઈને ખેડૂત પર તૂટી પડ્યા હતા. હુમલાખોરોએ અરવિંદસિંહને લક્ષ્ય બનાવીને તાબડતોબ 3 રાઉન્ડ ફાયરિંગ કર્યું હોવાનો ગંભીર આક્ષેપ કરાયો છે. આ દરમિયાન ત્રીજી ગોળી ખેડૂતના જમણા પગના ભાગે વાગી જતાં તેઓ લોહીલુહાણ થઈને ઢળી પડ્યા હતા.

ઈજાગ્રસ્ત ખેડૂત અમદાવાદ સિવિલમાં સારવાર હેઠળ

ઘટના બની તુરંત જ આસપાસના લોકો એકઠા થઈ જતાં હુમલાખોરો ત્યાંથી ફરાર થઈ ગયા હતા. ગંભીર રીતે ઈજાગ્રસ્ત બનેલા ખેડૂત અરવિંદસિંહ ચાવડાને તાત્કાલિક અસરથી વધુ અને સઘન સારવાર અર્થે અમદાવાદની સિવિલ હોસ્પિટલમાં ખસેડવામાં આવ્યા છે, જ્યાં હાલ તેમની તબીબી સારવાર ચાલી રહી છે. આ બનાવ અંગે મળેલી માહિતીના આધારે માણસા સ્થાનિક પોલીસે ત્વરિત કાર્યવાહી કરીને હુમલો કરનાર 8 આરોપીઓ સામે ગુનો નોંધી તેમને ઝડપી પાડવા ચક્ર ગતિમાન કર્યા છે.

આ પણ વાંચો : Kutchના મુન્દ્રામાં કાળમુખી માલગાડીનો આતંક, 17થી વધુ ગૌવંશ કચડાયા, પશુપ્રેમીઓમાં ભારે રોષ!