calendar_todayMarch 16, 2026
Gandhinagar News : 31 માર્ચે PM નરેન્દ્ર મોદી ગુજરાત આવે તેવી શક્યતા, ગાંધીનગરમાં જૈન સમાજના કાર્યક્રમમાં રહી શકે છે હાજર
જ્યાં એક મ્યુઝિયમનું પણ તેઓ ઉદ્ઘાટન કરવાના હોવાનું જણાવાય છે. વડાપ્રધાન સ્થાનિક સ્વરાજય સંસ્થાઓની ચૂંટણીઓના પરિપેક્ષ્યમાં ગુજરાત આવી રહ્યાં હોઈ એમના અન્ય કાર્યક્રમો પણ ગોઠવાઈ રહ્યાં છે. અગાઉ નવરચિત વાવ-થરાદ જિલ્લાની મુલાકાતે તેઓ જનારા હોવાનું જણાવાતું હતું. અલબત્ત આ કાર્યક્રમને હજી કન્ફર્મેશન મળતું નથી.
28 ફેબ્રુઆરી 2026ના રોજ અમદાવાદ આવ્યા હતા પીએમ નરેન્દ્ર મોદી
દરમિયાન વડાપ્રધાન મોદી સ્થાનિક સ્વરાજ્ય સંસ્થાઓની ચૂંટણીઓ તથા ઉમરેઠ વિધાનસભા બેઠકની પેટાચૂંટણીના સંદર્ભમાં એમની મુલાકાત દરમિયાન મુખ્યમંત્રી ભૂપેન્દ્ર પટેલ, ભાજપ પ્રદેશ પ્રમુખ જગદીશ પંચાલ તથા રાજ્યના અન્ય નેતાઓ સાથે બેઠક યોજી એમને માર્ગદર્શન આપે તેવી શક્યતા નકારી શકાતી નથી. આ જ સંદર્ભે વડાપ્રધાને મુખ્યમંત્રીને ગત અઠવાડિયે નવી દિલ્હી બોલાવી પરામર્શ કર્યો હતો. વડાપ્રધાન મોદી છેલ્લે ૨૮મી ફેબ્રુઆરીએ અમદાવાદ આવ્યા હતા અને તેમણે સાણંદ ખાતે યુએસ કંપની માઈક્રોન ટેક્નોલોજીસના સેમિકન્ડકટર એસેમ્બલી તથા ટેસ્ટિંગ પ્લાન્ટનું ઉદ્ઘાટન કર્યુ હતું.
18 એપ્રિલ નજીક સ્થાનિક સ્વરાજ્ય સંસ્થાઓની ચૂંટણીની અટકળો
ઉમરેઠ વિધાનસભા બેઠકની પેટાચૂંટણી ૨૩મી એપ્રિલે જાહેર થઈ હોઈ આ પહેલાં સ્થાનિક સ્વરાજ્ય સંસ્થાઓના પરિણામ આવી જશે એવી રાજકીય પક્ષોની ગણતરી સાચી માનીએ તો સ્થાનિક સ્વરાજ્યની ચૂંટણીઓ ૧૮ એપ્રિલ આસપાસ યોજાવાની અટકળ થઈ રહી છે. આ પરિપ્રેક્ષ્યમાં ૨૫મી માર્ચે વિધાનસભાનું અંદાજપત્ર સત્ર જેવું પૂર્ણ થશે કે તુર્ત જ એકાદ-બે દિવસમાં સ્થાનિક સ્વરાજ્ય સંસ્થાઓની ચૂંટણી માટે જાહેરાત થવાની અપેક્ષા રાખવામાં આવે છે. ટૂંકમાં ભરઉનાળે ૪૨-૪૫ ડિગ્રી તાપમાનમાં પહેલીવાર સ્થાનિક ચૂંટણીઓ યોજાવા જઈ રહી છે.
જોકે છેલ્લે 2024માં લોકસભાની ચૂંટણી પણ ઉનાળાની પરાકાષ્ઠાએ મે મહિનામાં યોજાઈ હતી
ગુજરાતમાં ૩૪ પૈકી ૩૨ જિલ્લા પંચાયતોમાં, ૨૬૦ જેટલી તાલુકા પંચાયતોમાં, અમદાવાદ સહિત ૧૫ મ્યુનિસિપલ કોર્પોરેશનોમાં તેમજ ૭૧ નગરપાલિકાઓમાં એકસાથે ચૂંટણીઓ યોજાનારી છે. આ સંદર્ભે બન્ને પ્રમુખ રાજકીય પક્ષો-ભાજપ-કોંગ્રેસમાં મોટાપાયે તૈયારીઓ ચાલી રહી છે. અમદાવાદ, સુરત, વડોદરા, રાજકોટ, જામનગર અને ભાવનગર મ્યુનિસિપલ કોર્પોરેશનોની તથા ૭૧ નગરપાલિકાઓની મુદત પૂર્ણ થઈ ગઈ છે અને અત્યારે ત્યાં વહીવટદારોનું રાજ ચાલી રહ્યું છે.