Gandhinagar News : શિક્ષકો માટે મોટા સમાચાર, નિવૃત્તિના 5 વર્ષ બાકી હોય તેમને TET પરીક્ષામાંથી મળશે મુક્તિ

ગુજરાત રાજ્યના શિક્ષણ વિભાગ દ્વારા શિક્ષકોની ફરજિયાત ટેટ (TET) પરીક્ષાને લઈને એક અત્યંત મહત્વપૂર્ણ નિર્ણય લેવામાં આવ્યો છે. લાંબા સમયથી ચાલી રહેલી ચર્ચાઓ અને વિવાદો વચ્ચે સરકારે સ્પષ્ટતા કરી છે કે જે શિક્ષકોની નિવૃત્તિને હવે માત્ર 5 વર્ષ કે તેથી ઓછો સમય બાકી છે, તેમને ટેટ પરીક્ષા આપવાની જરૂર રહેશે નહીં. આ નિર્ણયથી રાજ્યના વરિષ્ઠ શિક્ષકોમાં મોટી રાહત જોવા મળી રહી છે, કારણ કે નિવૃત્તિના આરે પહોંચેલા શિક્ષકો માટે આ ઉંમરે સ્પર્ધાત્મક પરીક્ષા આપવી એક પડકારરૂપ કાર્ય હતું. શિક્ષણ વિભાગના આ વલણથી અનુભવી શિક્ષકોના માથેથી પરીક્ષાનું ભારણ હળવું થયું છે.

શિક્ષણ વિભાગનો મહત્વનો નિર્ણય

બીજી તરફ, શિક્ષણ વિભાગે રાજ્યની શાળાઓમાં ફરજ બજાવતા એવા શિક્ષકોનો ડેટા એકત્રિત કરવાની કામગીરી તેજ કરી છે જેઓ હજુ સુધી ટેટ પરીક્ષા પાસ કરી શક્યા નથી. આ અંતર્ગત વર્ષ 2011 પહેલાં ભરતી થયેલા અને 2011 પછી ભરતી થયેલા પરંતુ ટેટ પાસ ન હોય તેવા શિક્ષકોની અલગ-અલગ યાદી મંગાવવામાં આવી છે. તંત્ર દ્વારા આ આંકડાકીય માહિતી મંગાવવામાં આવતા શિક્ષણ જગતમાં ભારે ચર્ચાઓ જાગી છે. આ યાદીના આધારે આગામી સમયમાં બિન-ટેટ પાસ શિક્ષકો માટે સરકાર કોઈ નવી નીતિ કે કડક વલણ અપનાવી શકે છે તેવી શક્યતાઓ પણ સેવાઈ રહી છે.

આ પણ વાંચો : Ahmedabad News : ‘ખાડા પડે ત્યારે કોઈ નથી આવતું, ઘર તોડવા તરત આવી ગયા’, તંત્ર સામે સ્થાનિકોનો ઉગ્ર રોષ