Gondalના ભંડારીયામાં યુવાનની હત્યાનો ભેદ ઉકેલાયો, ગાળો બોલવાની ના પાડતા મિત્રે જ કરી મિત્રની નિર્મમ હત્યા

રાજકોટ જિલ્લાના ગોંડલ તાલુકાના ભંડારીયા ગામેથી એક અત્યંત ચોંકાવનારી અને લોહિયાળ ઘટના સામે આવી છે. ગત તારીખ 18 જુલાઈ 2026ના રોજ મોડી રાત્રે આશરે સાડા બાર વાગ્યાના સુમારે ભંડારીયા ગામની સીમમાં હત્યાનો બનાવ બન્યો હતો. 28 વર્ષીય મૃતક લાલજી ડાબસરા પોતાના મિત્ર નીતિન મકવાણાની વાડીએ ગયો હતો. ત્યાં રાત્રિના સમયે સાથે જમતી વખતે ગાળો બોલવા જેવી સામાન્ય બાબતમાં બંને મિત્રો વચ્ચે ઉગ્ર બોલાચાલી અને ઝઘડો થયો હતો.

ગાળો બોલવા બાબતે થયો હતો ઝઘડો

ઝઘડા દરમિયાન લાલજીને ગાળો બોલવાની ના પાડવા છતાં તે ન માનતા, આવેશમાં આવી ગયેલા વાડી માલિક નીતિન મકવાણાએ લાકડી વડે લાલજી પર બેરહેમીપૂર્વક હુમલો કરી દીધો હતો. નીતિને લાકડીના આડેધડ ઘા ઝીંકી દેતા લાલજીને માથા તેમજ મોઢાના ભાગે ગંભીર અને જીવલેણ ઇજાઓ પહોંચી હતી. જેના કારણે 28 વર્ષીય આશાસ્પદ યુવાન લાલજીનું ઘટનાસ્થળે જ લોહીલુહાણ હાલતમાં કરુણ મોત નીપજ્યું હતું. બનાવ અંગે મૃતકના મોટા ભાઈ જગદિશભાઈ ડાબસરાએ આરોપી નીતિન સામે સુલતાનપુર પોલીસ મથકમાં સત્તાવાર ફરિયાદ નોંધાવી હતી.

પોલીસે ગણતરીના કલાકોમાં હત્યારાને દબોચી લીધો

હત્યા જેવા ગંભીર ગુનાની જાણ થતાં જ સુલતાનપુર પોલીસ મથકનો કાફલો તુરંત હરકતમાં આવ્યો હતો. ગુનાની ગંભીરતાને ધ્યાને રાખીને પોલીસે અલગ-અલગ ટીમો બનાવીને તપાસનો ધમધમાટ શરૂ કર્યો હતો. સુલતાનપુર પોલીસે ગુનાનો ભેદ ઉકેલીને ગણતરીના કલાકોમાં જ મુખ્ય આરોપી નીતિન મકવાણાને ઝડપી પાડ્યો છે. પોલીસે આરોપીની અટકાયત કરી હત્યામાં વપરાયેલું હથિયાર કબ્જે કરવા સહિતની આગળની કાયદાકીય કાર્યવાહી અને સઘન તપાસ હાથ ધરી છે.

ગુજરાતના વધુ સમાચાર વાંચવા માટે ક્લિક કરો