Gujarat મહાનગરપાલિકા ચૂંટણી: કોંગ્રેસે 6 શહેરો માટે 243 ઉમેદવારોના નામની સત્તાવાર જાહેરાત કરી

ગુજરાતમાં આગામી સ્થાનિક સ્વરાજની ચૂંટણીઓનો જંગ તેજ બન્યો છે, ત્યારે કોંગ્રેસ પક્ષ દ્વારા રાજ્યની મુખ્ય મહાનગરપાલિકાઓ માટે પોતાના ઉમેદવારોના નામની જાહેરાત કરી દેવામાં આવી છે. પક્ષ દ્વારા જાહેર કરવામાં આવેલી આ પ્રથમ યાદીમાં કુલ 243 ઉમેદવારોના નામ સામેલ છે. આ જાહેરાત સાથે જ અમદાવાદ, રાજકોટ, સુરત અને વડોદરા સહિતના મુખ્ય શહેરોમાં રાજકીય ગરમાવો આવી ગયો છે. પક્ષ દ્વારા જ્ઞાતિગત સમીકરણો અને સ્થાનિક પ્રભુત્વને ધ્યાનમાં રાખીને મૂરતિયાઓ પસંદ કરવામાં આવ્યા છે.

શહેર વાઈઝ ઉમેદવારોની સંખ્યા અને વિગત

કોંગ્રેસે આ યાદીમાં સૌથી વધુ બેઠકો અમદાવાદ મહાનગરપાલિકા માટે જાહેર કરી છે. વિગતવાર જોઈએ તો, અમદાવાદમાં 93, રાજકોટમાં 40, સુરતમાં 26 અને ભાવનગરમાં 25 ઉમેદવારોના નામ જાહેર કરાયા છે. આ ઉપરાંત મોરબીમાં 23, જ્યારે જામનગર અને વડોદરામાં 18-18 ઉમેદવારોને મેદાનમાં ઉતારવામાં આવ્યા છે. આ યાદીમાં જૂના જોગીઓ અને નવા ચહેરાઓનું સંતુલિત મિશ્રણ જોવા મળી રહ્યું છે, જે આગામી ચૂંટણીમાં સત્તાધારી પક્ષ સામે કાંટાની ટક્કર આપવા માટે સજ્જ છે.

સ્થાનિક સ્તરે ચૂંટણી પ્રચાર અને વ્યુહરચના

ઉમેદવારોના નામ જાહેર થવાની સાથે જ હવે તમામ મહાનગરોમાં ચૂંટણીલક્ષી પ્રચારનો ધમધમાટ શરૂ થઈ જશે. કોંગ્રેસ દ્વારા આ વખતે મોંઘવારી, બેરોજગારી અને સ્થાનિક ભ્રષ્ટાચાર જેવા મુદ્દાઓને મુખ્ય એજન્ડા બનાવવામાં આવ્યા છે. ખાસ કરીને અમદાવાદ અને રાજકોટ જેવા મોટા શહેરોમાં પક્ષે એન્ટિ-ઈન્કમ્બન્સીનો લાભ લેવા માટે આક્રમક ઉમેદવારોને મેદાનમાં ઉતાર્યા છે. હવે આગામી દિવસોમાં આ ઉમેદવારો દ્વારા વિધિવત રીતે ફોર્મ ભરવાની પ્રક્રિયા હાથ ધરવામાં આવશે.

ગુજરાતના વધુ સમાચાર વાંચવા માટે ક્લિક કરો