Gujarat High Court: ‘ભારત હવે સુંદર નથી લાગતું’, યુકેના ગુજરાતીએ દેશની સુરક્ષા સામે હાઈકોર્ટમાં ઉઠાવ્યા સવાલ

દેશની સુરક્ષા વ્યવસ્થા અને કાયદો-વ્યવસ્થાની સ્થિતિને લઈને એક અનોખો અને ચર્ચાસ્પદ મામલો ગુજરાત હાઈકોર્ટ સમક્ષ આવ્યો છે. યુકે (બ્રિટન) નિવાસી ગુજરાતી અરજદાર પંકજ પટેલે દેશની કાયદો અને વ્યવસ્થા બગડી હોવાની વ્યથા વ્યક્ત કરતા હાઈકોર્ટમાં જાહેરહિતની અરજી (PIL) દાખલ કરી છે. અરજી દરમિયાન ‘ભારત હવે પહેલા જેવું સુંદર નથી લાગતું’ તે પ્રકારની ટિપ્પણી પણ સામે આવી છે, જેને લઈને ન્યાયિક વર્તુળોમાં ભારે ચર્ચા જાગી છે.

OCI કાર્ડધારકના અધિકારો અંગે હાઈકોર્ટની સ્પષ્ટતા

આ કેસની સુનાવણી દરમિયાન ગુજરાત હાઈકોર્ટે મહત્વપૂર્ણ સવાલો ઉઠાવ્યા છે. કોર્ટે ખાસ કરીને ઓસીઆઈ (OCI - Overseas Citizen of India) કાર્ડધારકના ભારતમાં જાહેરહિતની અરજી (PIL) દાખલ કરવાના અધિકારો અંગે સ્પષ્ટતા માંગી છે. વિદેશી નાગરિકત્વ ધરાવતા કે OCI કાર્ડધારક વ્યક્તિ ભારતમાં આ પ્રકારે પીઆઈએલ દાખલ કરી શકે કે નહીં તે અંગે કાનૂની મુદ્દો ચર્ચાના કેન્દ્રમાં આવ્યો છે.

સરકાર સમક્ષ સ્પષ્ટતા માંગવામાં આવી, આગામી સુનાવણી 8 ડિસેમ્બરે

અરજદાર પંકજ પટેલ દ્વારા કરવામાં આવેલી રજૂઆતો અને કાનૂની જોગવાઈઓને ધ્યાનમાં રાખીને હાઈકોર્ટે રાજ્ય સરકાર તથા સંબંધિત સત્તાવાળાઓ સમક્ષ આ મામલે વિસ્તૃત સ્પષ્ટતા રજૂ કરવા માટે આદેશ કર્યો છે. આ કેસની ગંભીરતાને જોતાં હાઈકોર્ટે આગામી સુનાવણી 8 ડિસેમ્બરના રોજ હાથ ધરવાનું નક્કી કર્યું છે, જે પર હવે સૌની નજર ટકેલી છે.

આ પણ વાંચો: 29 October Top News: દિવાળી પર વીજ સંકટની અસર! કમોસમી વરસાદ પડવાની શક્યતા! સામુહિક આપઘાત પાછળનું કારણ શું?