Indian Navy વાઇસ ચીફ ઓસ્ટ્રેલિયા પ્રવાસે, વ્યૂહાત્મક રક્ષા ભાગીદારી પર મૂક્યો ભાર

ભારતીય નૌસેનાના વાઇસ ચીફ એડમિરલ કૃષ્ણા સ્વામીનાથન ઓસ્ટ્રેલિયાની મહત્વપૂર્ણ મુલાકાતે પહોંચ્યા છે. ઓસ્ટ્રેલિયાની રાજધાની કેનબેરા ખાતે તેમણે ઓસ્ટ્રેલિયાના ડિફેન્સ ફોર્સના વડા એડમિરલ માર્ક હેમન્ડ સાથે ઉચ્ચ સ્તરીય બેઠક યોજી હતી. આ મુલાકાત દરમિયાન ભારત અને ઓસ્ટ્રેલિયા વચ્ચે સતત વધી રહેલી વ્યૂહાત્મક રક્ષા ભાગીદારી અને બંને દેશોના નૌસેના સહયોગને નવી ઊંચાઈઓ પર લઈ જવા માટે વિસ્તૃત ચર્ચા-વિચારણા કરવામાં આવી હતી.

‘મરીટાઇમ સિક્યુરિટી કોલેબોરેશન રોડમેપ’ના અમલીકરણ અંગે ચર્ચા 

આ દ્વિપક્ષીય બેઠકમાં દરિયાઈ ક્ષેત્રમાં સુરક્ષા અને સંકલન વધારવા માટે ‘મરીટાઇમ સિક્યુરિટી કોલેબોરેશન રોડમેપ’ (Maritime Security Collaboration Roadmap) ના અસરકારક અમલીકરણ પર ખાસ ભાર મૂકવામાં આવ્યો હતો. બંને દેશોની નૌસેનાઓ વચ્ચે પરસ્પર સુસંગતતા (Interoperability) વધારવા, સંયુક્ત સૈન્ય અભ્યાસ યોજવા અને દરિયાઈ સુરક્ષા ક્ષેત્રે નવી તકો શોધવા અંગે સહમતી સાધવામાં આવી હતી.

મુક્ત અને સમૃદ્ધ ઈન્ડો-પેસિફિક ક્ષેત્ર માટે સહિયારા પ્રયાસોનો સંકલ્પ 

હિંદ-પ્રશાંત (Indo-Pacific) ક્ષેત્રમાં સુરક્ષા, સ્થિરતા અને શાંતિ જાળવી રાખવા માટે ભારત અને ઓસ્ટ્રેલિયાના સહયોગને અતિ મહત્વપૂર્ણ ગણાવવામાં આવ્યો હતો. બંને દેશોએ વ્યૂહાત્મક સહમતીઓને જમીની સ્તરે નક્કર પરિણામોમાં પરિવર્તિત કરવા માટે પોતાની પ્રતિબદ્ધતા વ્યક્ત કરી હતી. એક સુરક્ષિત, સ્થિર અને સમૃદ્ધ ઈન્ડો-પેસિફિક રીજનના નિર્માણ માટે દ્વિપક્ષીય રક્ષા સંબંધો વધુ ગાઢ બનાવવા માટેનો સંકલ્પ દોહરાવવામાં આવ્યો હતો.

વધુ સમાચાર વાંચવા માટે ક્લિક કરો