calendar_todayMarch 6, 2026
Indigoએ એડવાઇઝરી કરી જાહેર, મિડલ ઇસ્ટ માટે 17 ફ્લાઇટ્સ ચલાવશે ઇન્ડિગો
મધ્ય પૂર્વના દેશોમાં ઉભી થયેલી પ્રતિકૂળ પરિસ્થિતિ અને તણાવ વચ્ચે ફસાયેલા મુસાફરો માટે ઇન્ડિગો એરલાઇન્સે એક મહત્વપૂર્ણ એડવાઇઝરી જાહેર કરી છે. 6 માર્ચ, 2026 ના રોજ એરલાઇન મધ્ય પૂર્વના 8 અલગ-અલગ શહેરો માટે કુલ 17 ફ્લાઇટ્સનું સંચાલન કરશે. આ કામગીરીનો હેતુ ત્યાં ફસાયેલા ભારતીયો અને અન્ય મુસાફરોને સુરક્ષિત રીતે તેમના ગંતવ્ય સ્થાન સુધી પહોંચાડવાનો છે.
ઇન્ડિગોએ જાહેર કરી એડવાઇઝરી
ઇન્ડિગો દ્વારા આપવામાં આવેલી માહિતી મુજબ, એરલાઇન હાલમાં કુલ ૩૪ ક્ષેત્રો (sectors) માં પોતાની સેવાઓ આપી રહી છે. મધ્ય પૂર્વની વર્તમાન પરિસ્થિતિ અત્યંત સંવેદનશીલ હોવાથી, એરલાઇન પ્રત્યેક ડગલું સાવચેતીપૂર્વક ભરી રહી છે. કંપની સતત સરકારી સત્તાધીશો અને ઉડ્ડયન નિયમનકારો સાથે સંપર્કમાં છે જેથી ખાતરી કરી શકાય કે તમામ ફ્લાઇટ્સ સંપૂર્ણપણે સુરક્ષિત વાતાવરણમાં ઉડાન ભરે.
મુસાફરો માટે જરૂરી સૂચનાઓ
એરલાઇને સ્પષ્ટતા કરી છે કે આ મુસાફરીમાં વ્યવસ્થા જાળવવા માટે ખાસ નિયમો બનાવવામાં આવ્યા છે. માત્ર એવા જ મુસાફરોને મુસાફરીની મંજૂરી આપવામાં આવશે જેમનો એરલાઇન દ્વારા સીધો સંપર્ક કરવામાં આવ્યો હોય. એરલાઇનની ટીમો મુસાફરોના રજિસ્ટર્ડ કોન્ટેક્ટ નંબર અથવા ઇમેઇલ દ્વારા જ માહિતી આપી રહી છે, જેથી કોઈ અફવા કે ગેરસમજ ન ફેલાય.પરિસ્થિતિને જોતા તમામ સેવાઓ એકસાથે શરૂ કરવાને બદલે 'ફેઝ-વાઇઝ' એટલે કે તબક્કાવાર રીતે સામાન્ય બનાવવાનો પ્રયાસ કરવામાં આવી રહ્યો છે.
ઇન્ડિગો સતત બદલાતી પરિસ્થિતિ પર રાખી રહી છે નજર
ઇન્ડિગોએ જણાવ્યું છે કે તેઓ આ ક્ષેત્રમાં બદલાતી જતી પરિસ્થિતિ પર ૨૪ કલાક નજર રાખી રહ્યા છે. ભારત સરકાર અને સંબંધિત આંતરરાષ્ટ્રીય સંગઠનો સાથે પરામર્શ કરીને જ ફ્લાઇટના રૂટ્સ નક્કી કરવામાં આવી રહ્યા છે. આ એડવાઇઝરીનો મુખ્ય હેતુ મુસાફરોની સુરક્ષા સુનિશ્ચિત કરવાનો અને અનિશ્ચિતતાના માહોલમાં તેમને સચોટ માહિતી પૂરી પાડવાનો છે.