Jam Khambhaliaના કંડોરણામાં પહોંચ્યા 'સૌની યોજના'ના નીર: સુકાતા પાકને મળ્યું નવું જીવન

દેવભૂમિ દ્વારકા જિલ્લાના જામ ખંભાળિયા પંથકમાં ખેડૂતો માટે રાહતના સમાચાર આવ્યા છે. વરસાદના ખેંચાણને કારણે પાણીની અછત અનુભવી રહેલા કંડોરણા ગામે આવેલા ખારીવાળા તળાવમાં 'સૌની યોજના'ના નીર પહોંચ્યા છે. હાલમાં આ તળાવમાં અંદાજે 20થી 25 ટકા જેટલો પાણીનો જથ્થો ભરાઈ ગયો છે. લાંબા સમયથી વરસાદ ન હોવાને કારણે ખેતરોમાં સુકાઈ રહેલા ઉભા પાકને સૌનીનું પાણી મળતાં પાક બચી જવાની અને નવી સંજીવની મળવાની ખેડૂતોમાં મોટી આશા બંધાઈ છે.

પીવાના પાણી અને ઘાસચારાની સમસ્યા વચ્ચે આશીર્વાદરૂપ પગલું

પંથકમાં પીવાના પાણીની મુશ્કેલી અને પશુઓ માટે ઘાસચારાની તંગી સર્જાઈ રહી હતી, તેવા સમયે સૌની યોજનાનું પાણી તળાવમાં આવતાં સ્થાનિકો અને પશુપાલકો માટે આ નીર આશીર્વાદરૂપ સાબિત થયા છે. જો તળાવમાં વધુ પ્રમાણમાં પાણી છોડવામાં આવે તો કંડોરણા અને આસપાસના ગ્રામીણ વિસ્તારોના ખેડૂતો તેમજ સામાન્ય જનજીવનને પાણીની તંગીમાંથી મોટી રાહત મળી શકે તેમ છે. આ પાણીના આગમનથી હાલ પંથકના ખેડૂત આલમમાં ખુશીની લહેર જોવા મળી રહી છે.

દર 7થી 15 દિવસે નિયમિત પાણી છોડવા ખેડૂતોની સરકારને ગુહાર

જોકે, ખેડૂતોનું કહેવું છે કે હાલમાં તળાવમાં આવેલું પાણી માત્ર થોડા દિવસ જ ચાલી શકે તેમ છે અને માત્ર એક જ વખત પાણી છોડવાથી અછતની આ વિકટ સમસ્યાનો કાયમી ઉકેલ આવશે નહીં. પોતાના મોંઘા પાક અને પશુધનને બચાવવા માટે સરકાર સમક્ષ ગુહાર લગાવતાં ખેડૂતોએ માંગ કરી છે કે દર 7થી 15 દિવસના અંતરે નિયમિતપણે સૌની યોજનાનું પાણી છોડવામાં આવે. જો તળાવને સંપૂર્ણ ભરી દેવામાં આવે તો આસપાસના વિશાળ વિસ્તારના ખેડૂતોને લાંબા સમય સુધી મોટો ફાયદો થઈ શકે તેમ છે.

ગુજરાતના વધુ સમાચાર વાંચવા માટે ક્લિક કરો