Kadi : ઈરાણા, ઈન્દ્રાડ અને અણખોલના લોકોનો લોકસુનાવણીમાં ઉગ્ર વિરોધ!

કડી તાલુકાના ઈરાણા ગામની સીમમાં સર્વે નંબર 1054 ખાતે નવીન 'અમુરા ઈન્ડસ્ટ્રીઝ પ્રાઇવેટ લિમિટેડ' કંપની સ્થાપવાની દરખાસ્ત સામે સ્થાનિક ગ્રામજનોમાં ભારે આક્રોશ ફટી નીકળ્યો છે. સિન્થેટિક ઓર્ગેનિક કેમિકલ્સનું ઉત્પાદન કરતી આ કંપનીને મંજૂરી આપવાના મુદ્દે યોજાયેલી લોકસુનાવણીમાં ઈરાણા, ઈન્દ્રાડ અને અણખોલ ગામના અગ્રણીઓ સહિત મોટી સંખ્યામાં ગ્રામજનોએ વિરોધ નોંધાવી તંત્ર સમક્ષ પોતાની ચિંતા વ્યક્ત કરી હતી. ગ્રામજનોએ સ્પષ્ટ શબ્દોમાં જણાવ્યું હતું કે, વિસ્તારમાં પહેલેથી જ ઔદ્યોગિક પ્રદૂષણની સમસ્યા છે, ત્યારે વધુ એક કેમિકલ ફેક્ટરી શરૂ કરવાથી પર્યાવરણ, ખેતી અને લોકોના આરોગ્ય પર ગંભીર અસર થવાની ભીતિ છે.જીપીસીબીના નેહલ અજમેરા અને કડીનાં પ્રાંત અધિકારી જાગૃતિ પટેલના અધ્યક્ષસ્થાને યોજાયેલી લોકસુનાવણીમાં ગ્રામજનોએ કંપની સ્થાપવાની દરખાસ્ત સામે વાંધા રજૂ કર્યા હતા. ગ્રામજનોના જણાવ્યા મુજબ, કડી તાલુકાના છત્રાલ રોડ અને આસપાસના વિસ્તારોમાં અગાઉથી જ મોટી સંખ્યામાં ઔદ્યોગિક એકમો કાર્યરત છે. આવા ઉદ્યોગોમાંથી થતા પ્રદૂષણને કારણે સ્થાનિક લોકો હવા અને પાણીની ગુણવત્તા અંગે ચિંતિત છે. ત્યારે નવી કેમિકલ ફેક્ટરી શરૂ થાય તો પરિસ્થિતિ વધુ ગંભીર બનવાની આશંકા ગ્રામજનોએ વ્યક્ત કરી હતી.

ગુજરાતના વધુ સમાચાર વાંચવા માટે ક્લિક કરો