Keshod News: ટ્રક અને બાઈક વચ્ચેના ગમખ્વાર અકસ્માતમાં ચુડા ગામના યુવકનું કરુણ મોત

જૂનાગઢ જિલ્લાના કેશોદ-માંગરોળ રોડ પર આજે એક કાળમુખો અકસ્માત સર્જાયો છે. પૂરઝડપે આવી રહેલા એક ટ્રક અને બાઈક વચ્ચે જોરદાર ટક્કર થઈ હતી. અકસ્માત એટલો પ્રચંડ હતો કે બાઈક સવાર યુવક રોડ પર ફગાઈ ગયો હતો અને તેને શરીરે ગંભીર ઈજાઓ પહોંચી હતી. આ અકસ્માતને પગલે હાઈવે પર પસાર થતા વાહનચાલકોના ટોળેટોળા એકઠા થઈ ગયા હતા અને ટ્રાફિક જામના દ્રશ્યો સર્જાયા હતા.

ચુડા ગામના યુવકનું કરુણ મોત

આ અકસ્માતની સૌથી હૃદયદ્રાવક ઘટના એ છે કે, આ દુર્ઘટનામાં બહેનની નજર સામે જ ભાઈનું મોત નીપજ્યું હતું. મૃતક યુવક કેશોદ તાલુકાના ચુડા ગામનો રહેવાસી હોવાનું જાણવા મળ્યું છે. ગંભીર ઈજાઓને કારણે યુવકની હાલત અત્યંત નાજુક હતી અને હોસ્પિટલ પહોંચે તે પૂર્વે જ તેણે દમ તોડી દીધો હતો. નજર સામે જ જુવાનજોધ ભાઈને ગુમાવતા બહેનનું હૈયાફાટ રુદન જોઈને ત્યાં હાજર રહેલા દરેક વ્યક્તિની આંખમાં આંસુ આવી ગયા હતા.

ટ્રક ચાલક વિરુદ્ધ તપાસનો ધમધમાટ શરૂ 

કેશોદ પોલીસનો કાફલો ઘટનાની જાણ થતા જ ઘટનાસ્થળે પહોંચી ગયો હતો. પોલીસે અકસ્માતનો ગુનો નોંધીને ફરાર થઈ ગયેલા ટ્રક ચાલકને ઝડપી પાડવા ચક્રો ગતિમાન કર્યા છે. પોલીસે મૃતદેહને પોસ્ટમોર્ટમ માટે હોસ્પિટલ ખસેડ્યો છે અને અકસ્માતના કારણો જાણવા સીસીટીવી ફૂટેજ તેમજ પ્રત્યક્ષદર્શીઓની પૂછપરછ શરૂ કરી છે. રક્ષાબંધન અને ભાઈ-બહેનના પવિત્ર સંબંધ વચ્ચે સર્જાયેલી આ કરુણ ઘટનાએ ચુડા ગામ સહિત સમગ્ર પંથકમાં અરેરાટી ફેલાવી દીધી છે.

ગુજરાતના વધુ સમાચાર વાંચવા માટે ક્લિક કરો