Mehsana: અમદાવાદ તરફ જતી બસના ચાલકની ગંભીર બેદરકારી, લક્ઝરી અને ટ્રકની ટક્કરમાં 2 ના મોત, 13 ઘાયલ

મહેસાણા-રાજસ્થાન હાઈવે પર આજે વહેલી સવારે એક ભયાનક અકસ્માત સર્જાયો છે. અમદાવાદ તરફ જઈ રહેલી એક ખાનગી લક્ઝરી બસના ચાલકે રોંગ સાઇડમાં બસ હંકારી ટ્રક સાથે ધડાકાભેર અકસ્માત સર્જતા 2 લોકોના મોત નિપજ્યા છે, જ્યારે 13 જેટલા મુસાફરોને નાની-મોટી ઇજાઓ પહોંચી છે.

મહેસાણામાં ગમખ્વાર અકસ્માત

પ્રાપ્ત માહિતી અનુસાર, અકસ્માત એટલો જોરદાર હતો કે બસ અને ટ્રક બંનેના કુરચેકુરચા ઉડી ગયા હતા. પ્રત્યક્ષદર્શીઓના જણાવ્યા મુજબ, લક્ઝરી બસનો ચાલક રોંગ સાઇડ પર પૂરઝડપે બસ ચલાવી રહ્યો હતો અને સામેથી આવતી ટ્રક સાથે ટકરાયો હતો. અકસ્માતને પગલે હાઈવે પર ચીચીયારીઓ ગુંજી ઉઠી હતી અને સ્થાનિક લોકો તાત્કાલિક બચાવ કામગીરી માટે દોડી આવ્યા હતા.

જાનહાનિ અને સારવાર

આ અકસ્માતમાં 2 વ્યક્તિઓના ઘટનાસ્થળે જ મોત નિપજ્યા છે. આ સિવાય બસમાં સવાર અન્ય 13 મુસાફરોને ગંભીર ઇજાઓ પહોંચી છે, જેમને તાત્કાલિક 108 એમ્બ્યુલન્સ મારફતે મહેસાણાની સિવિલ હોસ્પિટલ અને ખાનગી હોસ્પિટલોમાં ખસેડવામાં આવ્યા છે. ઇજાગ્રસ્તો પૈકી કેટલાકની હાલત ગંભીર હોવાનું જાણવા મળી રહ્યું છે.

આ પણ વાંચો: Botad: રાણપુર પંથકમાં દીપડાના આતંકનો અંત, નાગનેશ ગામે વન વિભાગે દીપડાને પાંજરે પૂર્યો