Middle East: 8 ભારતીયોના મોત, 1 ગુમ, 55 લાખ ભારતીયો પરત ફર્યા, સરકારે કરી પુષ્ટિ

મધ્ય પૂર્વમાં સંઘર્ષનું ચક્ર ચાલુ છે. અમેરિકા-ઇઝરાયલ અને ઈરાન વચ્ચે હાલમાં તીવ્ર બોમ્બમારો ચાલી રહ્યો છે. આ યુદ્ધમાં અત્યાર સુધીમાં હજારો લોકોએ જીવ ગુમાવ્યા છે. વિદેશ મંત્રાલય (MEA) એ સોમવારે જણાવ્યું હતું કે મધ્ય પૂર્વમાં વિવિધ ઘટનાઓમાં આઠ ભારતીય નાગરિકોએ પોતાનો જીવ ગુમાવ્યો છે, જ્યારે એક નાગરિક ગુમ છે. સરકારે દાવો કર્યો છે કે ગુમ થયેલા નાગરિકને શોધવા માટે પ્રયાસો ચાલુ છે.

કુવૈત હુમલામાં ભારતીયએ ગુમાવ્યો જીવ 

મીડિયા સાથે વાત કરતા વિદેશ મંત્રાલયના અધિક સચિવ (અખાત) અસીમ આર. મહાજને પુષ્ટિ આપી હતી કે તાજેતરમાં કુવૈતમાં થયેલા હુમલામાં એક ભારતીય નાગરિકે પોતાનો જીવ ગુમાવ્યો છે. અમે શોકગ્રસ્ત પરિવાર પ્રત્યે અમારી ઊંડી સંવેદના વ્યક્ત કરીએ છીએ. જો કે તેમણે મોતનુ કારણ સ્પષ્ટ જણાવ્યું ન હતું. તેમણે ઉમેર્યું હતું કે કુવૈતમાં ભારતીય દૂતાવાસ મૃતકના પરિવાર સાથે સંપર્કમાં છે અને શક્ય તમામ સહાય પૂરી પાડવા અને નશ્વર અવશેષોને ભારતમાં ઝડપથી પરત લાવવા માટે સ્થાનિક અધિકારીઓ સાથે સંકલનમાં કામ કરી રહ્યું છે. મહાજને વધુમાં જણાવ્યું હતું કે 28 ફેબ્રુઆરીથી, મધ્ય પૂર્વથી આશરે 5.5 મિલિયન પ્રવાસીઓ ભારત પાછા ફર્યા છે.

સંવાદ અને રાજદ્વારી દ્વારા યુદ્ધનો અંત 

વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે અમે સંઘર્ષની પરિસ્થિતિ પર નજીકથી નજર રાખી રહ્યા છીએ. અમે સંયમ દાખવવા અને તણાવ ઓછો કરવા માટેની અમારી અપીલને પુનરાવર્તિત કરીએ છીએ. સાથે સાથે શક્ય તેટલી વહેલી તકે સંઘર્ષનો અંત લાવવા માટે સંવાદ અને રાજદ્વારીની જરૂરિયાત પર ભાર મૂકીએ છીએ. તેમણે નોંધ્યું હતું કે આ સંદર્ભમાં વડા પ્રધાન નરેન્દ્ર મોદીએ 28 માર્ચે ક્રાઉન પ્રિન્સ અને સાઉદી અરેબિયાના વડા પ્રધાન પ્રિન્સ મોહમ્મદ બિન સલમાન સાથે વાત કરી હતી.

પીએમ મોદીએ સાઉદી નેતા સાથે કરી હતી વાતચીત 

પીએમ મોદીએ સાઉદી નેતા સાથે મધ્ય પૂર્વમાં ચાલી રહેલા સંઘર્ષ અંગે ચર્ચા કરી હતી અને વાણિજ્યિક શિપિંગની સલામતી અને નેવિગેશનની સ્વતંત્રતા સુનિશ્ચિત કરવા માટેની સહિયારી પ્રતિબદ્ધતા પર ભાર મૂક્યો હતો. પ્રવક્તા રણધીર જયસ્વાલે ઉમેર્યું હતું કે, સાઉદી ક્રાઉન પ્રિન્સ સાથે ટેલિફોનિક વાતચીત દરમિયાન પીએમ મોદીએ પ્રાદેશિક ઉર્જા માળખાને લક્ષ્યાંકિત કરતા હુમલાઓની ભારતની નિંદાનો પણ પુનરોચ્ચાર કર્યો હતો. ભારતીયો માટે દૂતાવાસ 24 કલાક કામ કરે છે

વિદેશ મંત્રાલયના અધિક સચિવ (અખાત) અસીમ આર. મહાજને જણાવ્યું હતું કે ભારતીય સમુદાયના લાખો સભ્યો મધ્ય પૂર્વના વિવિધ દેશોમાં રહે છે. સરકાર તેમની સલામતી અને સુરક્ષાને ખૂબ જ ગંભીરતાથી લે છે. આ દેશોમાં અમારા દૂતાવાસો ચોવીસ કલાક કાર્યરત છે. અમે ભારતીય સમુદાય સાથે સતત સંપર્ક જાળવી રાખીએ છીએ. અમે 24x7 હેલ્પલાઇન ચલાવી રહ્યા છીએ અને નિયમિતપણે જરૂરી સલાહ આપી રહ્યા છીએ.મધ્ય પૂર્વમાં ચાલી રહેલા સંઘર્ષ વચ્ચે વિદેશ મંત્રાલયે સોમવારે જણાવ્યું હતું કે સંઘર્ષમાં અત્યાર સુધીમાં આઠ ભારતીય નાગરિકોએ પોતાનો જીવ ગુમાવ્યો છે. એક ભારતીય નાગરિક ગુમ છે. વધુમાં, 5.5 મિલિયન લોકો સુરક્ષિત રીતે ભારત પરત ફર્યા છે.

આ પણ વાંચો: ભારતના કયા રાજ્યમાં તેલના સૌથી વધારે કૂવા ?