Modasa: ઉમેદપુર ગામમાં શ્રી સ્વયંભૂ ખંડુજી મહાદેવના મંદિરનો મેળો યોજાયો

અરવલ્લી જિલ્લાના મોડાસા તાલુકામાં આવેલા ઐતિહાસિક ગામ ઉમેદપુર(દધાલિયા) ખાતે બિરાજમાન ભગવાન શ્રી સ્વયંભૂ ખંડુજી મહાદેવના સાનિધ્યમાં ભક્તિનો સાગર ઘુઘવાયો છે. દર વર્ષની પરંપરા મુજબ યોજાતા આ ભવ્ય લોકમેળામાં રવિવારે વહેલી સવારના ચાર વાગ્યાથી જ ભક્તોનું ઘોડાપૂર ઉમટી પડયું હતું. આ વર્ષે ભક્તોની સંખ્યાએ ભૂતકાળના તમામ રેકોર્ડ તોડી નાખ્યા છે અને મંદિર પરિસરમાં જ્યાં નજર કરો ત્યાં માત્ર શ્રદ્ધાળુઓનું માનવ મહેરામણ જ દ્રશ્યમાન થઈ રહ્યું છે.મેળાના પ્રારંભથી જ સમગ્ર ઉમેદપુર અને આસપાસનો વિસ્તાર શિવમય બની ગયો હતો. મંદિર તરફ્ આવતા તમામ માર્ગો ભક્તોની ભીડથી ચિક્કાર ભરાઈ ગયા હતા. શ્રદ્ધાળુઓ પોતાના હાથમાં પૂજાની સામગ્રી અને શ્રીફ્ળ લઈને કલાકો સુધી લાંબી કતારોમાં શિસ્તબદ્ધ રીતે ઊભા રહીને ભોળાનાથના દર્શન માટે આતુર દેખાતા હતા.વહેલી સવારની મંગલા આરતીથી શરૂ થયેલો ભક્તોનો પ્રવાહ બપોર સુધી અવિરત ચાલુ રહ્યો હતો. ચારેય તરફ્થી ગુંજી ઉઠતા હર હર મહાદેવ, બમ બમ ભોલે અને જય ખંડુજી દાદાના ગગનભેદી જયઘોષથી અરવલ્લીની પ્રાકૃતિક ગિરિમાળાઓ અને વનરાજી ગુંજી ઉઠી હતી. ભક્તોના મુખ પર ભીડની થાકને બદલે મહાદેવના દર્શનનો એક અનોખો આનંદ અને સંતોષ જોવા મળતો હતો. આ વિશેષ દિવસ નિમિત્તે સ્વયંભૂ પ્રગટ થયેલા પવિત્ર શિવલિંગને ગર્ભગૃહમાં બહુ જ કલાત્મક રીતે સજાવવામાં આવ્યું હતું. દાદાના સાનિધ્યને સુગંધિત પુષ્પોની પાંખડીઓ, ગુલાબ, ગલગોટાના હાર અને રંગબેરંગી માળાઓથી ભવ્ય આંગી કરવામાં આવી હતી. શિવલિંગ પર સતત વહેતી જલધારા અને તેની ઉપર લટકતી દિવ્ય કાવડના દર્શન માત્રથી જ ભક્તોના હૃદયમાં ભક્તિનો સંચાર થતો હતો.

ગુજરાતના વધુ સમાચાર વાંચવા માટે ક્લિક કરો