Morbi ભાજપમાં સામાજિક વિવાદનો વંટોળ: વોર્ડ નં. 9ના ઉમેદવાર સામે રોષ, ચૂંટણી કાર્યાલય પરથી ફોટો હટાવાયો

મોરબી નગરપાલિકાની ચૂંટણીમાં વોર્ડ નંબર 9ના ભાજપના ઉમેદવાર હિરેન કરોતરા સામે સામાજિક વિરોધ ઉઠતા ભાજપ માટે મુશ્કેલ સ્થિતિ સર્જાઈ છે. વિવાદની વિગત એવી છે કે ઉમેદવાર હિરેન કરોતરા પાટીદાર સમાજની દીકરીને છૂટાછેડા આપતા ન હોવાથી લોકોમાં ભારે આક્રોશ જોવા મળી રહ્યો છે. આ સામાજિક વિવાદ એટલો વકર્યો છે કે ચૂંટણી કાર્યાલય પર લગાવવામાં આવેલા બેનરોમાં ચારના બદલે માત્ર ત્રણ જ ઉમેદવારોના નામ અને ફોટા લગાવવાની ફરજ પડી છે.

પાટીદાર સમાજની દીકરીને ન્યાય અપાવવા લોક આક્રોશ

હિરેન કરોતરા સામેના આક્ષેપોને પગલે પાટીદાર સમાજમાં ભારે નારાજગી ફેલાઈ છે. સ્થાનિક લોકો અને સમાજના અગ્રણીઓનો આક્ષેપ છે કે પારિવારિક પ્રશ્નોમાં ઉમેદવારનું વલણ યોગ્ય નથી, જેને કારણે દીકરીને અન્યાય થઈ રહ્યો છે. આ આક્રોશને જોતા ચૂંટણી પ્રચારના પ્રારંભે જ ભાજપના અન્ય ઉમેદવારો અને સંગઠન માટે ચિંતાજનક પરિસ્થિતિ ઉભી થઈ છે. લોકો દ્વારા વિવાદિત ઉમેદવારનો બહિષ્કાર કરવાની ચીમકી પણ ઉચ્ચારવામાં આવી છે.

વિવાદિત ઉમેદવારનો ફોટો હટાવી નવા ફોટા સાથે પ્રચારની તૈયારી

સામાજિક વિવાદ વધુ ન વકરે તે માટે અંતે ભાજપે વ્યૂહાત્મક નિર્ણય લેવો પડ્યો છે. વોર્ડ નંબર 9ના ચૂંટણી કાર્યાલય પરથી વિવાદિત ઉમેદવારનો ફોટો દૂર કરી દેવામાં આવ્યો છે અને નવા ફોટા સાથેના બેનરો લગાવવામાં આવ્યા છે. જોકે, ચૂંટણીના ગણતરીના દિવસો બાકી છે ત્યારે આ પ્રકારનો સામાજિક વિવાદ ભાજપની આખી પેનલના વિજય પર અસર કરી શકે તેમ છે. હાલમાં આ મુદ્દો સમગ્ર મોરબીમાં ચર્ચાનું કેન્દ્ર બન્યો છે.

ગુજરાતના વધુ સમાચાર વાંચવા માટે ક્લિક કરો