calendar_todayMay 6, 2026
Mumbai Airport: 7 મેના રોજ 6 કલાક માટે મુંબઇ એરપોર્ટના બંને રનવે રહેશે બંધ, જાણો ફ્લાઇટની દરેક વિગતો
મુંબઈનું છત્રપતિ શિવાજી મહારાજ ઇન્ટરનેશનલ એરપોર્ટ (CSMIA) આવતીકાલે એટલે કે 7 મે, ગુરુવારના રોજ તેના બંને રનવે પર કામગીરી સ્થગિત રાખશે. એરપોર્ટ વહીવટીતંત્ર દ્વારા વાર્ષિક 'ચોમાસા પૂર્વેની જાળવણી' (Pre-Monsoon Maintenance) માટે આ મહત્વપૂર્ણ નિર્ણય લેવામાં આવ્યો છે.
સમય અને શેડ્યૂલ
એરપોર્ટ મેનેજમેન્ટ કંપની MIAL ના જણાવ્યા મુજબ, રનવે સવારે 11:00 વાગ્યાથી સાંજે 5:00 વાગ્યા સુધી સંપૂર્ણપણે બંધ રહેશે. આ છ કલાક દરમિયાન કોઈ પણ ફ્લાઇટ ઉતરાણ (Landing) કે ઉડાન (Takeoff) ભરી શકશે નહીં. જોકે, આ આયોજન અગાઉથી નક્કી હોવાથી મોટાભાગની એરલાઇન્સે છ મહિના પહેલા જ પોતાના સમયપત્રકમાં ફેરફાર કરી દીધો હતો, તેમ છતાં પ્રવાસીઓને અસુવિધા થવાની શક્યતા નકારી શકાય તેમ નથી.
શા માટે રનવે બંધ રાખવો જરૂરી છે?
મુંબઈમાં ચોમાસા દરમિયાન અતિભારે વરસાદ અને પાણી ભરાવાની સમસ્યા સામાન્ય છે. આવા સમયે વિમાનોની સુરક્ષિત અવરજવર માટે રનવેની સપાટી અને એરસાઇડ ઇન્ફ્રાસ્ટ્રક્ચરનું નિરીક્ષણ કરવું અનિવાર્ય બને છે. 1,033 એકરમાં ફેલાયેલા આ વ્યસ્ત એરપોર્ટ પર રનવેના ઘસારાને તપાસવા માટે વિશેષ ટીમો તૈનાત કરવામાં આવશે, જેથી વરસાદી સિઝનમાં કોઈ મોટી દુર્ઘટના ન સર્જાય.
મુસાફરો પર અસર અને ડાયવર્ઝન
દરરોજ 1,000 થી વધુ ફ્લાઇટ્સનું સંચાલન કરતા મુંબઈ એરપોર્ટ પર આ શટડાઉનને કારણે કેટલીક ફ્લાઇટ્સ રદ થઈ શકે છે અથવા મોડી પડી શકે છે. જરૂરિયાત મુજબ, કેટલીક ફ્લાઇટ્સને નજીકના એરપોર્ટ જેવા કે અમદાવાદ, પુણે અથવા ગોવા ખાતે ડાયવર્ટ કરવામાં આવશે. જ્યારે આંતરરાષ્ટ્રીય અને લાંબા અંતરની ફ્લાઇટ્સને દિલ્હી કે બેંગલુરુ જેવા મુખ્ય એરપોર્ટ દ્વારા રૂટ કરવામાં આવી શકે છે.
મુસાફરો માટે જરૂરી સલાહ:
સ્ટેટસ તપાસો: એરપોર્ટ જવા નીકળતા પહેલા એરલાઇન અથવા CSMIA ની સત્તાવાર વેબસાઇટ પર ફ્લાઇટનું સ્ટેટસ ચોક્કસ ચેક કરો.
વધારો સમય રાખો: સાંજે 5:00 વાગ્યા પછી એરપોર્ટ ફરી શરૂ થશે ત્યારે ફ્લાઇટ્સના બેકલોગને કારણે વિલંબ થઈ શકે છે, તેથી હાથમાં વધારાનો સમય રાખીને પહોંચો.
રિફંડ અને રિબુકિંગ: જો તમારી ફ્લાઇટ રદ થઈ હોય, તો રિફંડ અથવા વૈકલ્પિક ફ્લાઇટ માટે તુરંત સંબંધિત એરલાઇનનો સંપર્ક કરો.
મુંબઈ એરપોર્ટ વહીવટીતંત્ર મુસાફરોની સુરક્ષા માટે આ કામગીરી કરી રહ્યું છે, ત્યારે પ્રવાસીઓએ આયોજનપૂર્વક મુસાફરી કરવા વિનંતી છે.