calendar_todaySeptember 10, 2026
Mumbai : ‘Special 26’ જેવી ફેક રેડનો ખેલ! IT-ક્રાઈમ બ્રાન્ચના નકલી અધિકારી બની વેપારી પાસેથી રૂ.1 કરોડ માંગ્યા
મુંબઈની અંધેરી પોલીસે ‘Special 26’ની તર્જ પર ફેક ઇન્કમ ટેક્સ અને ક્રાઈમ બ્રાન્ચ અધિકારી બની રેડ પાડતા ગેંગનો પર્દાફાશ કર્યો છે. આરોપીઓએ એક વેપારીના ઘરે પહોંચી પોતાને ઇન્કમ ટેક્સ અધિકારી તરીકે ઓળખાવ્યા હતા અને તેની સામે વિભાગીય કાર્યવાહી ચાલી રહી હોવાનું કહી વેપારી અને તેની પત્નીને જબરદસ્તી કારમાં બેસાડ્યા હતા.
ઓફિસમાં પહોંચ્યા, 11 કર્મચારીઓને પણ કેદ કર્યા
આરોપીઓ વેપારી અને તેની પત્નીને તેમના બિઝનેસ પરિસરમાં લઈ ગયા હતા. તે સમયે ઓફિસમાં વેપારીના 11 કર્મચારીઓ હાજર હતા. આરોપીઓએ ત્યાં પણ પોતાને ઇન્કમ ટેક્સ અને ક્રાઈમ બ્રાન્ચના અધિકારી-કર્મચારી તરીકે રજૂ કર્યા હતા. નકલી સરકારી ઓળખપત્રો બતાવી સમગ્ર કાર્યવાહી અસલી સરકારી રેડ જેવી લાગે તેવું વાતાવરણ ઊભું કરવામાં આવ્યું હતું.
લૅન્ડલાઇન કાપી, મોબાઇલ જપ્ત કર્યા
ફેક રેડ દરમિયાન આરોપીઓએ ઓફિસના લૅન્ડલાઇન ફોનના તાર કાપી નાખ્યા હતા. વેપારી, તેની પત્ની અને તમામ 11 કર્મચારીઓના મોબાઇલ ફોન પણ પોતાના કબજામાં લઈ લીધા હતા. કર્મચારીઓને એક રૂમમાં બંધ કરી બહાર જવા પર રોક લગાવવામાં આવી હતી.
રૂ.1 કરોડ આપો, નહીં તો કાર્યવાહી!
આરોપીઓએ વેપારી અને તેની પત્નીને ઇન્કમ ટેક્સની કાર્યવાહીનો ડર બતાવી ગાળો આપી હતી. સમગ્ર મામલો પતાવી દેવાના બદલામાં રૂ.1 કરોડની માંગણી કરવામાં આવી હોવાનો આરોપ છે.
3 મહિલાઓની હરકતથી વેપારીને શંકા ગઈ
ફેક રેડ દરમિયાન વેપારીને ગેંગમાં સામેલ 3 મહિલાઓના વર્તન પર શંકા ગઈ હતી. તેમની વાતચીત અને હાવભાવ ઇન્કમ ટેક્સ અધિકારીઓ જેવા ન લાગતા વેપારીને રેડ નકલી હોવાની આશંકા થઈ હતી. ત્યારબાદ મામલો પોલીસ સુધી પહોંચ્યો અને અંધેરી પોલીસે તપાસ શરૂ કરી.
ટેક્નિકલ તપાસથી ગેંગ સુધી પહોંચી પોલીસ
પોલીસે ટેક્નિકલ તપાસના આધારે આરોપીઓની ઓળખ કરી અને ધરપકડ શરૂ કરી હતી. અત્યાર સુધીમાં કુલ 10 લોકો ઝડપાઈ ચૂક્યા છે. તપાસમાં સામે આવ્યું કે ગેંગમાં સામેલ 2 ઇન્કમ ટેક્સ અધિકારીઓ અને અન્ય 2 આરોપીઓએ બાકીના લોકોને ફેક રેડમાં અલગ-અલગ ભૂમિકા ભજવવા માટે તૈયાર કર્યા હતા.
રૂ.50 હજાર આપવાનું વચન, કોઈ અધિકારી તો કોઈ કર્મચારી બન્યું
ફેક રેડને અસલી સરકારી કાર્યવાહી જેવી દેખાડવા માટે દરેક વ્યક્તિને રૂ.50 હજાર આપવાનું વચન આપવામાં આવ્યું હતું. કોઈને અધિકારીની ભૂમિકા આપવામાં આવી હતી તો કોઈને કર્મચારી બનાવીને સમગ્ર ઓપરેશન તૈયાર કરવામાં આવ્યું હતું.
મુંબઈ પહેલાં થાણેમાં પણ ‘ફેક રેડ’!
પોલીસ તપાસમાં આ ગેંગની કથિત ગતિવિધિઓ માત્ર અંધેરી સુધી સીમિત ન હોવાનું સામે આવ્યું છે. અગાઉ થાણેના માનપાડા વિસ્તારમાં પણ આવી જ ફેક રેડ કરવામાં આવી હતી, જેમાં આશરે રૂ.25 લાખ પડાવાયા હોવાની માહિતી સામે આવી હતી. આ કેસમાં પોલીસે અગાઉ 2 આરોપીઓની ધરપકડ કરી હતી.