Narmada : દર્શનાર્થીઓ માટે આકર્ષણનું કેન્દ્ર બન્યું કલાત્મક રંગોળી પ્રદર્શન

પવિત્ર નવરાત્રી મહોત્સવ નિમિત્તે નર્મદા જિલ્લામાં રાજપીપળા સ્થિત સુપ્રસિદ્ધ શ્રી હરસિદ્ધિ માતાજી મંદિરે શ્રદ્ધા, કલા અને ભક્તિનો ત્રિવેણી સંગમ જોવા મળી રહ્યો છે. જગત જનની મા હરસિદ્ધિની આરાધના અને દર્શન માટે દરરોજ લાખોની સંખ્યામાં શ્રદ્ધાળુઓ અહીં માઇમંદિરે ઉમટી રહ્યા છે. મંદિરમાં દર્શનાર્થે આવતા ભક્તો અને પદયાત્રીઓ હાથમાં માતાજીની પવિત્ર ધજાઓ સાથે જયઘોષથી ગુંજી રહ્યું છે. આ ઉપરાંત, મંદિર તરફ્ જતા મુખ્ય માર્ગો પર પૂજા-અર્ચનાની સામગ્રી, શ્રીફ્ળ-ચુંદડી અને મેળા માટે સ્ટોલ ઉભા કરાતા મેળો ધમધમતો થયો છે. આ આસો નવરાત્રીના પાવન અવસરે ભક્તો માટે દર્શન ઉપરાંત એક કલાત્મક આકર્ષણ પણ ઊભું કરવામાં આવ્યું છે. મંદિરના પ્રાંગણમાં આવેલા હોલના પહેલા માળે રંગોળી પ્રદર્શનનું આયોજન કરવામાં આવ્યું છે. આ પ્રદર્શનમાં નર્મદા જિલ્લાના ઉત્સાહી અને પ્રતિભાશાળી યુવા કલાકારો દ્વારા મા હરસિદ્ધિની દિવ્ય તથા આબેહૂબ પ્રતિકૃતિઓ તેમજ મા શક્તિના નવ સ્વરૂપોને રંગોળીના માધ્યમથી કંડારવામાં આવ્યા છે.

ગુજરાતના વધુ સમાચાર વાંચવા માટે ક્લિક કરો