Nasvadiના પાલા ગામે SOGનો દરોડો, કપાસના પાકની આડમાં થતી ગાંજાની ખેતીનો થયો પર્દાફાશ!

છોટાઉદેપુર જિલ્લામાં એસ.ઓ.જી. (Special Operations Group) પોલીસે ગુપ્ત બાતમીના આધારે નસવાડી તાલુકાના પાલા ગામે સફળ દરોડો પાડી ગેરકાયદેસર નશાકારક ખેતીનો પર્દાફાશ કર્યો છે. પોલીસે કપાસના પાકની આડમાં ઉગાડવામાં આવેલા લીલા ગાંજાના 81 વિશાળ છોડ જપ્ત કર્યા છે. જપ્ત કરાયેલા આ વનસ્પતિજન્ય જથ્થાની બજાર કિંમત રૂ.50,42,500 આંકવામાં આવી છે.

ખેતર માલિક રવિશંકર ભીલની ધરપકડ

બાતમી મળતાં જ એસ.ઓ.જી. ટીમે પાલા ગામ સ્થિત ખેતરમાં દરોડો પાડીને પૂર્ણપણે વિકસિત થયેલા ગાંજાના છોડ કબ્જે લીધા હતા. આ ગેરકાયદેસર વાવેતર કરવા બદલ પોલીસે ખેતરના માલિક રવિશંકરભાઇ ભીલની સ્થળ પરથી જ ધરપકડ કરી લીધી છે. આરોપી ખેતરમાં પાકની વચ્ચે ગાંજાનું વાવેતર કરીને કાળો કારોબાર ચલાવતો હતો.

પોલીસની NDPS એક્ટ હેઠળ આગળની કાર્યવાહી

છોટાઉદેપુર પોલીસે આરોપી વિરુદ્ધ NDPS (નાર્કોટિક ડ્રગ્સ એન્ડ સાયકોટ્રોપિક સબસ્ટન્સ) એક્ટ હેઠળ ગુનો નોંધી વધુ તપાસ હાથ ધરી છે. આ ગાંજાનું વાવેતર કેટલા સમયથી ચાલતું હતું, તેને ક્યાં વેચવાનો પ્લાન હતો અને આ નેટવર્કમાં અન્ય કોણ કોણ સામેલ છે તે દિશામાં પોલીસ દ્વારા સઘન પૂછપરછ ચાલુ છે.

ગુજરાતના વધુ સમાચાર વાંચવા માટે ક્લિક કરો