Navsari: બિલીમોરા-વઘઈ હેરિટેજ ટ્રેન, 110 વર્ષની ભવ્ય સફર, જ્યાં આજેય ઇતિહાસ અને પ્રકૃતિનો થાય છે અદભૂત મેળાપ

ગુજરાત જ્યારે બુલેટ ટ્રેનની દિશામાં આગળ વધી રહ્યું છે, ત્યારે નવસારીના બિલીમોરાથી ડાંગના વઘઈ સુધી દોડતી 110 વર્ષ જૂની નેરોગેજ ટ્રેન રાજ્યની સાંસ્કૃતિક અસ્મિતાનો પુરાવો આપી રહી છે. ગાયકવાડ શાસનકાળની આ હેરિટેજ ટ્રેન માત્ર મુસાફરીનું સાધન નથી, પણ પ્રવાસીઓ માટે ભૂતકાળમાં ડોકિયું કરવાની એક સોનેરી તક છે.

લાકડાની હેરફેરથી પર્યટન સુધીની સફર

આ રેલવે લાઇનની શરૂઆત વર્ષ 1913માં 'ગાયકવાડ બરોડા સ્ટેટ રેલવે' દ્વારા કરવામાં આવી હતી. તે સમયે ડાંગના ગાઢ જંગલોમાંથી કિંમતી સાગના લાકડા લાવવા માટે આ લાઇન નખાઈ હતી. આજે આ 63 કિલોમીટરનો ટ્રેક દક્ષિણ ગુજરાતના સૌથી સુંદર પ્રકૃતિના દ્રશ્યો પીરસે છે.

શિમલાની ટોય ટ્રેન જેવો અનુભવ

આ ટ્રેન કલાકના 20 થી 25 કિલોમીટરની ધીમી ગતિએ દોડે છે, જે મુસાફરોને બહારના દ્રશ્યો માણવા માટે પૂરતો સમય આપે છે. સાડા ત્રણ કલાકની આ મુસાફરીમાં આજે પણ જૂની પરંપરાઓ જળવાયેલી છે. રેલવે કર્મચારી ટ્રેનમાંથી ઉતરીને જાતે ટ્રાફિક રોકે છે અને ફાટક બંધ કરે છે - જે આજના ઓટોમેશનના યુગમાં દુર્લભ દ્રશ્ય છે. રેલવે વિભાગે આ ટ્રેનના મૂળ લાકડાના માળખા અને હેરિટેજ લુકને જાળવી રાખીને તેનો વારસો સાચવ્યો છે.

28 લાખ પ્રવાસીઓની પસંદગી

આ હેરિટેજ ટ્રેન પ્રત્યેનો ક્રેઝ આજે પણ અકબંધ છે. વર્ષ 2023-24 દરમિયાન 28 લાખથી વધુ પ્રવાસીઓએ આ ટ્રેનમાં મુસાફરી કરી છે. ગાઢ જંગલો, ગ્રામીણ જીવન અને ખેતરો વચ્ચેથી પસાર થતી આ ટ્રેન સાચા અર્થમાં ગુજરાતનું ઘરેણું સાબિત થઈ રહી છે. પ્રકૃતિના ખોળે વિતાવેલી આ ક્ષણો પ્રવાસીઓના મન જીતી લે છે.

આ પણ વાંચો: Kutch: માંડવીના નાના લાયજા-પાંચોટીયા વિસ્તારમાંથી ચરસના 7 પેકેટ ઝડપાયા