Palanpur : ની અક્ષરધામ-4 માં ગૌપૂજન સાથે શેરીગરબા

પાલનપુરની અક્ષરધામ-4 રેસિડેન્સીમાં નવરાત્રિના ચોથા નોરતે ગૌપૂજન અને શેરી ગરબાના ભક્તિમય માહોલ વચ્ચે ધાર્મિક અને સાંસ્કૃતિક કાર્યક્રમનું આયોજન કરવામાં આવ્યું હતું. આ પ્રસંગે સમગ્ર સોસાયટી પરિવાર વતી સુવર્ણ કપિલા તરીકે ઓળખાતી દિવ્ય અને દુર્લભ ગૌમાતા તથા નંદી મહારાજનું વૈદિક વિધિથી પૂજન-અર્ચન અને આરતી કરવામાં આવી હતી ત્યારબાદ ગૌમાતાનાં સોસાયટીના વિવિધ ઘરોમાં પધરામણાં કરાવી ભાવપૂર્વક પૂજન કરવામાં આવ્યું હતું. આ અનોખા આયોજનથી રહેવાસીઓમાં શ્રદ્ધા, ભક્તિ અને ગૌસેવા પ્રત્યેની ભાવનાનો સંચાર થયો હતો. આ સમગ્ર કાર્યક્રમના આયોજનમાં ગૌસેવક હિતેશભાઈ ગામીની સક્રિય અને પ્રેરણાદાયી ભૂમિકા રહી હતી. વર્ષોથી ગૌસેવામાં સમર્પિત રહી તેઓ સમાજમાં ગૌમાતાના મહત્વ, કરુણા અને જીવદયા પ્રત્યે જાગૃતિ લાવવાનું કાર્ય કરી રહ્યા છે. આવા ધાર્મિક અને સાંસ્કૃતિક આયોજનો માત્ર પરંપરાનું જતન કરતા નથી. પરંતુ નવી પેઢીમાં ગૌસેવા, જીવદયા, કરુણા અને ભારતીય સંસ્કૃતિના સંસ્કારોનું સિંચન પણ કરે છે. ભક્તિ સાથે સંસ્કૃતિ અને સેવાનો સમન્વય સાધતો આ કાર્યક્રમ અક્ષરધામ-4 ના રહેવાસીઓ માટે શ્રદ્ધા અને આનંદનો યાદગાર અવસર બન્યો હતો.

ગુજરાતના વધુ સમાચાર વાંચવા માટે ક્લિક કરો