Palitanaમાં જિલ્લા પોલીસ વડા નિતેશ પાંડેની અધ્યક્ષતામાં યોજાયો લોક દરબાર

ભાવનગર જિલ્લાના પવિત્ર યાત્રાધામ પાલિતાણા શહેરમાં કાયદો અને વ્યવસ્થાની સ્થિતિ વધુ સુદ્રઢ બનાવવાના હેતુથી એક વિશેષ લોક દરબારનું આયોજન કરવામાં આવ્યું હતું. ભાવનગર જિલ્લા પોલીસ વડા (SP) નિતેશ પાંડેની અધ્યક્ષતામાં યોજાયેલા આ લોક દરબારમાં સ્થાનિક નાગરિકો, નગરશ્રેષ્ઠીઓ અને સામાજિક આગેવાનો મોટી સંખ્યામાં ઉપસ્થિત રહ્યા હતા. કાર્યક્રમ દરમિયાન નાગરિકોએ પોતાના પડતર પ્રશ્નો અને વિસ્તારની સુરક્ષા અંગેની સમસ્યાઓ રજૂ કરી હતી.

ટ્રાફિક, દારૂ, વ્યાજખોરી અને સાયબર ફ્રોડ જેવા મુદ્દાઓ પર રજૂઆત

લોક દરબાર દરમિયાન સ્થાનિક લોકો તથા આગેવાનો દ્વારા પાલિતાણા શહેરમાં સર્જાતી ટ્રાફિકની સમસ્યા, દેશી-વિદેશી દારૂનું દૂષણ, ગેરકાયદે વ્યાજખોરી, વધતા જતા સાયબર ફ્રોડના બનાવો તેમજ સ્થાનિક પોલીસ સ્ટેશનમાં સ્ટાફની ઘટ જેવા મહત્વપૂર્ણ મુદ્દાઓ અંગે એસપી સમક્ષ વિગતવાર રજૂઆતો કરવામાં આવી હતી.

DySP અને પોલીસ અધિકારીઓની ઉપસ્થિતિ વચ્ચે પ્રશ્નોના નિકાલની ખાતરી

આ લોક દરબારમાં ડીવાયએસપી (DySP), પાલિતાણા ટાઉન પોલીસ સ્ટેશનના પીઆઈ/પીએસઆઈ સહિતના સ્થાનિક પોલીસ અધિકારીઓ પણ ખાસ ઉપસ્થિત રહ્યા હતા. જિલ્લા પોલીસ વડા નિતેશ પાંડેએ નાગરિકોની તમામ રજૂઆતો અને ફરિયાદોને શાંતિપૂર્વક સાંભળી હતી અને ટ્રાફિક નિયંત્રણ તથા અસામાજિક પ્રવૃત્તિઓ પર લગામ કસવા માટે ઝડપી નિરાકરણ લાવવાની ખાતરી આપી હતી.

ગુજરાતના વધુ સમાચાર વાંચવા માટે ક્લિક કરો