PM Modi in Loksabha: સંસદમાં PM પર હુમલાનું ષડયંત્ર...લોકસભામાં PMનુ સંબોધન એટલે ન થયું ?

લોકસભામાં રાષ્ટ્રપતિના અભિભાષણ પર ધન્યવાદ પ્રસ્તાવ દરમિયાન પીએમ મોદી ભાષણ ન આપી શક્યા. આ બાબતે હવે રાજકીય ગરમાવો વધી રહ્યો છે. બીજેપી સાંસદ મનોજ તિવારી અને કંગના રનોતે ગંભીર આરોપો લગાવીને વિપક્ષની નિંદા કરી છે. ત્યારે સૂત્રોના હવાલે એક એવા સમાચાર સામે આવ્યા છે જેમાં કહેવામાં આવી રહ્યું છે કે કોંગ્રેસે તો પીએમ મોદી પર શારીરિક હુમલાની તૈયારી પણ કરી હતી. આ કારણે જ ભાષણ ન થઇ શકયુ.

આજે સંસદના બજેટ સત્રનો સાતમો દિવસ છે. બજેટ સત્રના સાતમા દિવસે લોકસભામાં ભારે હોબાળા વચ્ચે રાષ્ટ્રપતિના ભાષણ પર આભાર પ્રસ્તાવ ધ્વનિ મતથી પસાર કરવામાં આવ્યો. લગભગ 22 વર્ષમાં પહેલી વાર એવું બન્યું છે કે પ્રધાનમંત્રીના ભાષણ વિના આભાર પ્રસ્તાવ પસાર થયો હોય. જોકે, પીએમ મોદીની ગેરહાજરી પાછળનું કારણ હવે બહાર આવ્યું છે. સૂત્રોના જણાવ્યા અનુસાર, કોંગ્રેસ પાર્ટીએ પીએમ મોદી પર શારીરિક હુમલો કરવાની તૈયારી કરી હતી. આ કારણોસર ભાષણ આપવામાં આવ્યું ન હતું.

લોકસભા સચિવાલયના સૂત્રોના જણાવ્યા અનુસાર રાષ્ટ્રપતિના ભાષણ પર આભાર પ્રસ્તાવ દરમિયાન પ્રધાનમંત્રીએ લોકસભામાં કોઈ વાત ન કરી તે અભૂતપૂર્વ છે. એવી માહિતી મળી હતી કે કોંગ્રેસ પાર્ટી લોકસભામાં પ્રધાનમંત્રી પર શારીરિક હુમલો કરવાની યોજના બનાવી રહી છે. તેથી ષડયંત્રના ભાગરૂપે જ મહિલા સાંસદોને ઢાલ તરીકે આગળ મોકલવામાં આવી હતી.

લોકસભા સચિવાલયના સૂત્રોના જણાવ્યા અનુસાર, પીએમ મોદી સંસદમાં તેમના ભાષણ પર બોલવા માટે તૈયાર હતા. બધી તૈયારીઓ અગાઉથી કરવામાં આવી હતી. જોકે વિપક્ષ શરૂઆતથી જ હોબાળો મચાવી રહ્યો હતો, અને બધા જોઈ રહ્યા હતા. આને ધ્યાનમાં રાખીને, કોંગ્રેસે ગૃહમાં પીએમ મોદીને ઘેરવાની યોજના બનાવી હતી.

સચિવાલયના સૂત્રો માને છે કે આ બાબતે કોંગ્રેસના વરિષ્ઠ નેતાઓ સાથે ઘણી ચર્ચાઓ થઈ ચૂકી છે. જોકે તેઓ જીદ્દી રહ્યા. અધિકારીઓએ ઘણી બેઠકોમાં તેમને સમજાવવાનો પ્રયાસ પણ કર્યો, પરંતુ તેઓ હાર માન્યા નહીં. તેથી, પીએમ મોદીએ લોકસભામાં રાષ્ટ્રપતિના ભાષણ પર કોઈ વાત કરી નહીં.

ભાજપ સાંસદ મનોજ તિવારીએ કહ્યું કે કોંગ્રેસે પીએમ મોદી પર શારીરિક હુમલો કરવા માટે મહિલા સાંસદોનો ઢાલ તરીકે ઉપયોગ કર્યો હતો. આખી યોજના તેમનો ઢાલ તરીકે ઉપયોગ કરીને બનાવવામાં આવી હતી. તેઓ હુમલો કરવાના એકમાત્ર ઈરાદાથી સંસદમાં આવ્યા હતા. મનોજ તિવારીએ બુધવારે કહ્યું હતું કે તેઓ બધા સંસદમાં વડા પ્રધાનની ખુરશીને ઘેરી લેવા અને તેમના પર હુમલો કરવા માગે છે.