Prantijના વિલાસપુરામાં મોટી દુર્ઘટના ટળી: 50 ફૂટ ઊંડા કૂવામાં ખાબકેલી યુવતીનું સાહસિક રેસ્ક્યુ

સાબરકાંઠા જિલ્લાના પ્રાંતિજ તાલુકાના વિલાસપુરા ગામમાં આજે એક હૃદયદ્રાવક ઘટના સામે આવી છે. અહીં એક યુવતી અચાનક 50 ફૂટ ઊંડા કૂવામાં ખાબકી હતી. જોકે, સ્થાનિક લોકોની સમયસૂચકતા અને પૂર્વ ધારાસભ્યની ત્વરિત દરમિયાનગીરીને કારણે યુવતીને મોતના મુખમાંથી બહાર કાઢવામાં સફળતા મળી છે. ફાયર બ્રિગેડના જવાનોએ ભારે જહેમત બાદ યુવતીને હેમખેમ બહાર કાઢતા સૌએ રાહતનો શ્વાસ લીધો હતો.

ફાયર ટીમ આવે ત્યાં સુધી પૂર્વ ધારાસભ્યએ યુવતીને હિંમત આપી

યુવતી કૂવામાં પડી હોવાની જાણ થતા જ પૂર્વ ધારાસભ્ય તાત્કાલિક ઘટનાસ્થળે દોડી આવ્યા હતા. તેમણે સમય વેડફ્યા વગર તુરંત જ હિંમતનગર ફાયર બ્રિગેડની ટીમને જાણ કરી હતી. ફાયરની ટીમ ઘટનાસ્થળે પહોંચે તે દરમિયાન કૂવામાં પડેલી યુવતી ગભરાઈ ન જાય અને તેનું મનોબળ ન તૂટે તે માટે પૂર્વ ધારાસભ્યએ કૂવા પરથી તેની સાથે સતત વાતો ચાલુ રાખી હતી. તેમણે યુવતીને આશ્વાસન આપી હિંમત ટકાવી રાખવામાં મહત્વની ભૂમિકા ભજવી હતી.

ભારે જહેમત બાદ યુવતીનું સફળ રેસ્ક્યુ

ફાયર બ્રિગેડની ટીમે સ્થળ પર પહોંચીને અત્યાધુનિક સાધનો અને દોરડાની મદદથી રેસ્ક્યુ ઓપરેશન હાથ ધર્યું હતું. જવાનોએ ખૂબ જ સાવચેતીપૂર્વક કૂવામાં ઉતરીને યુવતીને બહાર કાઢી હતી. સદનસીબે, યુવતીને કોઈ ગંભીર ઇજા થઈ નથી અને તે સંપૂર્ણપણે હેમખેમ છે. યુવતીએ ફાયર ટીમને જણાવ્યું હતું કે તે ચાલતા જઈ રહી હતી ત્યારે અજાણતા જ તેનો પગ લપસી ગયો હતો અને તે કૂવામાં પડી ગઈ હતી. સમયસર રેસ્ક્યુ ઓપરેશન પાર પડતા વિલાસપુરા ગામમાં સર્જાયેલી અફરાતફરી શાંત થઈ હતી.

ગુજરાતના વધુ સમાચાર વાંચવા માટે ક્લિક કરો