PSI Written Exam date: PSI ભરતીની લેખિત પરીક્ષાની તારીખ જાહેર, આ તારીખથી નીકળશે કોલ લેટર

ગુજરાત પોલીસ ભરતી બોર્ડ દ્વારા પીએસઆઈ (PSI) ની શારીરિક કસોટી પૂર્ણ કર્યા બાદ હવે ઉમેદવારો જેની આતુરતાથી રાહ જોઈ રહ્યા હતા તે લેખિત પરીક્ષાની તારીખ જાહેર કરી દેવામાં આવી છે. રાજ્યના હજારો યુવાનોના ભાવિનો ફેંસલો આગામી 19 એપ્રિલના રોજ લેખિત પરીક્ષા દ્વારા કરવામાં આવશે.

બે પાળીમાં લેવાશે પરીક્ષા

ભરતી બોર્ડના જણાવ્યા અનુસાર, 19 એપ્રિલના રોજ બે મહત્વના પેપરની પરીક્ષા લેવામાં આવશે. જેમાં સવાર અને સાંજની બે અલગ-અલગ પાળીમાં ઉમેદવારોની બૌદ્ધિક અને વિષયલક્ષી ક્ષમતાની ચકાસણી કરવામાં આવશે. એટલે કે એક જ દિવસે બે પેપર લેવામાં આવશે. શારીરિક કસોટીમાં ઉત્તીર્ણ થયેલા ઉમેદવારો જ આ લેખિત પરીક્ષામાં બેસી શકશે. પોલીસ બેડામાં જોડાવવા માંગતા ઉમેદવારો માટે આ અંતિમ અને નિર્ણાયક તબક્કો માનવામાં આવે છે.

કોલ લેટર અંગે મહત્વની અપડેટ

પરીક્ષાની જાહેરાતની સાથે જ કોલ લેટર ડાઉનલોડ કરવાની તારીખ પણ સ્પષ્ટ કરી દેવામાં આવી છે. ઉમેદવારો 13 એપ્રિલથી ભરતી બોર્ડની સત્તાવાર વેબસાઈટ પરથી પોતાના કોલ લેટર ડાઉનલોડ કરી શકશે. ઉમેદવારોને સલાહ આપવામાં આવે છે કે, તેઓ વહેલી તકે કોલ લેટર મેળવી લે જેથી પરીક્ષા કેન્દ્ર અને સમય બાબતે કોઈ મૂંઝવણ ન રહે.

તંત્ર સજ્જ

શારીરિક કસોટી સફળતાપૂર્વક પૂર્ણ થયા બાદ હવે લેખિત પરીક્ષા માટે વહીવટી તંત્ર દ્વારા પણ તૈયારીઓ તેજ કરી દેવામાં આવી છે. પરીક્ષામાં કોઈ ગેરરીતિ ન થાય તે માટે ચુસ્ત પોલીસ બંદોબસ્ત અને સીસીટીવી કેમેરાની દેખરેખ હેઠળ આયોજન કરવામાં આવશે. ઉમેદવારો છેલ્લા ઘણા સમયથી આ પરીક્ષા માટે રાત-દિવસ મહેનત કરી રહ્યા છે, ત્યારે હવે તેમની મહેનતની કસોટીનો સમય આવી ગયો છે.

આ પણ વાંચો - DAHOD: દાહોદ જિલ્લામાં સાત PSIની PI તરીકે બઢતી સાથે બદલી