Pune-Mumbai એક્સપ્રેસ વે પર 24 કલાકથી લાંબો ટ્રાફિક જામ, હજારો વાહનચાલકો થયા પરેશાન

મુંબઈ-પૂણે એક્સપ્રેસ વે પર 24 કલાકથી વધારે સમય પસાર થયા બાદ પણ ટ્રાફિકજામની સ્થિતિ ગંભીર બનેલી છે. ખંડાલા ઘાટની આડોશી સુરંગની પાસે મંગળવારે સાંજે લગભગ 5 વાગ્યે કેમિકલથી ભરેલું એક ગેસ ટેન્કર મુંબઈ તરફ જતી લેનમાં પલટી ગયું હતું. આ અકસ્માત બાદ ટેન્કરમાંથી ગેસ ગળતર શરૂ થઈ ગયું, જેનાથી સમગ્ર વિસ્તારમાં જોખમભરી સ્થિતિ ઉભી થઈ.

20થી 22 કિલોમીટર સુધી ગાડીઓની લાંબી લાઈનો લાગી

આ દુર્ઘટનાના કારણે મુંબઈ તરફથી આવતા ટ્રાફિકને સુરક્ષાના કારણે પુરી રીતે બંધ કરવામાં આવ્યો છે. તેની અસર બંને દિશાઓમાં જોવા મળી રહી છે. એક્સપ્રેસ વે પર લગભગ 20થી 22 કિલોમીટર સુધી ગાડીઓની લાંબી લાઈનો લાગી ગઈ છે. ડ્રોન દ્વારા સામે આવેલા દ્રશ્યોમાં સ્પષ્ટ જોઈ શકાય છે કે હજારો વાહનચાલકો અને મુસાફરો ટ્રાફિકમાં ફસાયેલા છે.

લોકોને જમવા માટે નથી મળી રહ્યું ભોજન

ઘણા લોકો સવારે 4 વાગ્યાથી એક જ જગ્યા પર અટકેલા છે. આ ભારે ટ્રાફિકજામના કારણે ઘણા મુસાફરોની ફ્લાઈટ છુટી ગઈ છે. સ્થળ પર પાણી, ભોજન અને ટોયલેટની વ્યવસ્થા ના હોવાથી લોકોને મોટી મુશ્કેલીનો સામનો કરવો પડી રહ્યો છે. મુસાફરોની માગ છે કે તંત્ર તાત્કાલિક પગલા ભરે અને રોડને ઝડપી જ શરૂ કરવામાં આવે.

NDRF, BPCL અને અન્ય રાહત ટીમો ઘટનાસ્થળે પહોંચી

ઉલ્લેખનીય છે કે ગેસ ટેન્કરમાંથી થઈ રહેલા ગેસ ગળતરથી કોઈને નુકસાન ના પહોંચે અને સુરક્ષાના કારણે મુંબઈ લેન બંધ કરવામાં આવી છે. NDRF, BPCL અને અન્ય રાહત ટીમો સ્થળ પર યુદ્ધના ધોરણે કામ કરી રહી છે. વાહનચાલકોને અપીલ કરવામાં આવી છે કે તે વૈકલ્પિક માર્ગનો ઉપયોગ કરે, જ્યાં સુધી ગેસ લિકેજ પુરી રીતે બંધ કરવામાં ના આવે. 

આ પણ વાંચો: 6 લાખની કાર અને 2.08 કરોડની નંબર પ્લેટ, જાણો કોણ છે આ વિરલો?