Rajkot RTO બન્યું સ્માર્ટ: કલર કોડેડ નેવિગેશન સિસ્ટમનો પ્રારંભ, હવે એજન્ટો વગર સીધું જ થશે કામ

રાજકોટ RTO કચેરીમાં કામકાજ અર્થે આવતા અરજદારોને હવે દિશા શોધવા માટે કોઈને પૂછવું નહીં પડે કે લાઈનોમાં ઊભા રહેવું નહીં પડે. તંત્ર દ્વારા સ્માર્ટ નેવિગેશન સિસ્ટમ અમલી બનાવવામાં આવી છે. આ સિસ્ટમ હેઠળ કચેરીના ફ્લોર પર અલગ-અલગ રંગના એરો (તીર) અને સ્ટીકરો લગાવવામાં આવ્યા છે. અરજદારે માત્ર પોતાના કામ મુજબનો કલર પસંદ કરવાનો રહેશે અને તે કલરના એરોને ફોલો કરીને તેઓ સીધા જ સંબંધિત કાઉન્ટર સુધી પહોંચી શકશે.

એજન્ટ રાજનો આવશે અંત

ઘણીવાર RTOમાં આવતા અજાણ્યા અરજદારો કામ ક્યાં કરાવવું તેની મુંઝવણમાં એજન્ટોનો સહારો લેતા હોય છે, જેના કારણે તેમને વધારાના નાણાં ખર્ચવા પડતા હોય છે. આ નવી કલર કોડેડ સિસ્ટમનો મુખ્ય હેતુ એજન્ટ રાજ ખતમ કરવાનો છે. આધુનિક પદ્ધતિથી અરજદારો પોતે જ પોતાનું કામ સરળતાથી કરાવી શકશે, જેનાથી ભ્રષ્ટાચાર પર અંકુશ આવશે અને કામગીરીમાં પારદર્શિતા વધશે.

ઝડપી કામગીરી અને લાંબી લાઈનોમાંથી મુક્તિ

આ સ્માર્ટ સિસ્ટમથી RTOની કામગીરી વધુ ઝડપી અને સુવ્યવસ્થિત બનશે. કલર કોડેડ ગાઈડન્સને કારણે કાઉન્ટરો પર થતી બિનજરૂરી ભીડ ઘટશે અને અરજદારોનો સમય બચશે. રાજકોટ RTOની આ પહેલની અત્યારે અરજદારોમાં ખૂબ પ્રશંસા થઈ રહી છે, કારણ કે હવે "માત્ર કલર પસંદ કરો અને પહોંચો કાઉન્ટર પર" સૂત્ર સાથે વહીવટ વધુ લોકાભિમુખ બન્યો છે.

ગુજરાતના વધુ સમાચાર વાંચવા માટે ક્લિક કરો