RBI એ આ બેંકનું લાઇસન્સ કર્યુ રદ્દ, જાણો કઈ રીતે પાછા મળશે તમારા નાણાં?

ભારતીય રિઝર્વ બેંક (RBI) એ બેંકિંગ નિયમોના ઉલ્લંઘન અને નબળી આર્થિક સ્થિતિને ધ્યાનમાં રાખીને મુંબઈ સ્થિત સર્વોદય સહકારી બેંકનું લાઇસન્સ રદ કરવાનો મહત્વનો નિર્ણય લીધો છે. 12 મે, 2026 ના રોજ વ્યવસાયિક કલાકો સમાપ્ત થયા બાદ આ બેંક હવે કોઈપણ પ્રકારની બેંકિંગ કામગીરી કરી શકશે નહીં. આ નિર્ણયને કારણે બેંકના હજારો ગ્રાહકો હવે તેમના ખાતામાંથી સીધી રીતે નાણાં ઉપાડી કે જમા કરી શકશે નહીં.

શા માટે લેવાયો આ સખત નિર્ણય?

કેન્દ્રીય બેંકે સ્પષ્ટ કર્યું છે કે સર્વોદય સહકારી બેંક પાસે હાલમાં પૂરતી મૂડી અને કમાણીની ક્ષમતાનો અભાવ છે. બેંક તેની વર્તમાન નાણાકીય સ્થિતિ મુજબ તેના થાપણદારોને સંપૂર્ણ રકમ ચૂકવવા સક્ષમ નથી. આરબીઆઈના મતે, જો આ બેંકને વધુ સમય સુધી કામ કરવાની મંજૂરી આપવામાં આવે, તો તે જાહેર હિત અને ગ્રાહકોના વિશ્વાસ માટે જોખમી સાબિત થઈ શકે તેમ હતું. બેંક લાંબા સમયથી અનેક નિયમનકારી આવશ્યકતાઓનું પાલન કરવામાં નિષ્ફળ રહી હતી.

ગ્રાહકોના પૈસાનું શું થશે?

બેંકના ગ્રાહકો માટે રાહતના સમાચાર એ છે કે, 98.36 ટકા થાપણદારોને તેમના ખાતામાં જમા થયેલી સંપૂર્ણ રકમ પાછી મળી જશે. લિક્વિડેશનની પ્રક્રિયા હેઠળ, દરેક થાપણદાર 'ડિપોઝિટ ઇન્શ્યોરન્સ એન્ડ ક્રેડિટ ગેરંટી કોર્પોરેશન' (DICGC) દ્વારા ₹5 લાખ સુધીનો વીમો મેળવવા હકદાર છે. એટલે કે, જે ગ્રાહકોની જમા રકમ 5 લાખ કે તેથી ઓછી છે, તેમને વીમા કવચ હેઠળ પૂરેપૂરી રકમ પરત મળશે.

આગામી પ્રક્રિયા અને લિક્વિડેટરની નિમણૂક

RBI એ મહારાષ્ટ્રના સહકારી કમિશનર અને રજિસ્ટ્રારને આદેશ આપ્યો છે કે બેંકને બંધ કરવાની પ્રક્રિયા શરૂ કરવામાં આવે અને એક લિક્વિડેટરની નિમણૂક કરવામાં આવે. લિક્વિડેટર બેંકની મિલકતોની વસૂલાત કરશે અને ગ્રાહકોના લેણાં પતાવવાની કામગીરી સંભાળશે. આંકડાઓ મુજબ, 31 માર્ચ, 2026 સુધીમાં DICGC એ પહેલેથી જ ₹26.72 કરોડની વીમાકૃત થાપણોની ચુકવણી કરી દીધી છે.

તેમના દાવા રજૂ કરવા આ પ્રક્રિયાને અનુસરવાની રહેશે

હવેથી આ બેંક 'બેંકિંગ' શબ્દનો ઉપયોગ કરી શકશે નહીં અને થાપણો સ્વીકારવા જેવી તમામ પ્રવૃત્તિઓ પર તાત્કાલિક અસરથી પ્રતિબંધ લગાવી દેવામાં આવ્યો છે. ગ્રાહકોએ હવે તેમના દાવા રજૂ કરવા માટે વહીવટીતંત્ર દ્વારા નક્કી કરવામાં આવેલી પ્રક્રિયાને અનુસરવાની રહેશે.

આ પણ વાંચોઃ લદ્દાખ જનારાં માટે ખુશીના સમાચાર, શ્રીનગર-લેહ હાઇવે ફરીથી ખુલશે, જાણો ક્યારથી?