Suratના વેપારી સાથે રૂ.1.24 કરોડની ઠગાઈ: નકલી સાયબર ફોરેન્સિક અધિકારી બની રોફ જમાવનાર આરોપીની મુંબઈથી ધરપકડ

સુરત શહેરમાં સાયબર ઠગાઈના એક ગંભીર કેસમાં સુરત સાયબર ક્રાઈમ સેલ પોલીસને મોટી સફળતા મળી છે. ઠગ ટોળકીએ સુરતના એક વેપારીને નિશાન બનાવીને ફોરેક્સ ટ્રેડિંગ (Forex Trading) માં રોકાણ કરવા પર અધધ નફો અપાવવાની લાલચ આપી હતી. આ પ્રલોભનમાં ફસાઈને વેપારીએ અલગ-અલગ ટ્રાન્ઝેક્શન દ્વારા કુલ 1.24 કરોડ રૂપિયા રોકાણ પેટે ચૂકવી દીધા હતા. જો કે, બાદમાં જ્યારે વેપારીએ પોતાના નાણાં પરત માંગ્યા ત્યારે આરોપીઓએ હાથ ઊંચા કરી દીધા હતા અને સંપર્ક વિહોણા થઈ ગયા હતા. 

સરકારી અધિકારીની ખોટી ઓળખ આપી જમાવતો રોફ

આ સમગ્ર કૌભાંડનો મુખ્ય આરોપી પ્રિયાંક સમીરભાઈ વ્યાસ અત્યંત ચતુર હોવાનું તપાસમાં બહાર આવ્યું છે. તે પોતાની કાર પર રાષ્ટ્રીય પ્રતીક અશોક સ્તંભ લગાવતો હતો અને સરકારનું સત્તાવાર બોર્ડ લગાવીને ફરતો હતો. એટલું જ નહીં, પ્રભાવશાળી દેખાવા માટે તે સેલિબ્રિટીઝ સાથે ફોટા પડાવીને સોશિયલ મીડિયા પર રોફ જમાવતો હતો અને લોકોને પોતાની જાળમાં ફસાવવા માટે પોતાને 'સૌથી મોટો સાયબર ફોરેન્સિક અધિકારી' તરીકે ઓળખાવતો હતો.

મુંબઈથી ધરપકડ, રૂ.9.65 લાખનો મુદ્દામાલ જપ્ત

સુરત સાયબર ક્રાઈમ પોલીસે ટેક્નિકલ સર્વેલન્સ અને બાતમીના આધારે વોટર પકડીને મુખ્ય આરોપી પ્રિયાંક વ્યાસને મુંબઈથી ઝડપી પાડ્યો છે. પોલીસે તેની પાસેથી મોબાઈલ ફોન, લેપટોપ, ક્રિપ્ટો વોલેટ કાર્ડ, બે ફોર-વ્હીલર ગાડીઓ, સરકારી હોદ્દા દર્શાવતા બનાવટી કાર્ડ્સ તેમજ હાર્ડ ડિસ્ક સહિત કુલ રૂપિયા 9.65 લાખનો મુદ્દામાલ જપ્ત કર્યો છે. આ કેસમાં સંડોવાયેલા અન્ય એક આરોપી રોહન કેલાવાલાની ધરપકડ બાદ આ આંતરરાજ્ય ઠગાઈના નેટવર્કમાં વધુ ચોંકાવનારા ખુલાસા થવાની પૂરી શક્યતાઓ છે.

ગુજરાતના વધુ સમાચાર વાંચવા માટે ક્લિક કરો