Surendranagarના ધ્રાંગધ્રા બાયપાસ પરથી ઝડપાયો વિદેશી દારૂનો જથ્થો: 2 આરોપીઓની ધરપકડ

સુરેન્દ્રનગર જિલ્લાના ધ્રાંગધ્રા બાયપાસ રોડ પર આવેલી કૂડા ચોકડી નજીકથી પોલીસે ઈંગ્લીશ દારૂનો મોટો જથ્થો ઝડપી પાડ્યો છે. ધ્રાંગધ્રા તાલુકા પોલીસ સર્વેલન્સ ટીમને ચોક્કસ બાતમી મળી હતી કે એક આઈ-20 કારમાં ગેરકાયદેસર રીતે વિદેશી દારૂની હેરાફેરી થઈ રહી છે. આ બાતમીના આધારે પોલીસે ત્વરિત કાર્યવાહી કરીને વોચ ગોઠવી હતી અને શંકાસ્પદ કારને અટકાવીને તલાશી લેતા તેમાંથી રૂ.2,01,940ની કિંમતની 205 બોટલ ઈંગ્લીશ દારૂનો જથ્થો મળી આવ્યો હતો.

રાજસ્થાનના બે આરોપીઓની ધરપકડ અને મુદ્દામાલ જપ્ત

પોલીસે દારૂનો જથ્થો જપ્ત કરવાની સાથે કારમાં સવાર બે શખ્સોની સ્થળ પરથી જ ધરપકડ કરી લીધી છે. પકડાયેલા આરોપીઓની ઓળખ રાજસ્થાનના રહેવાસી હમીરસિંહ રાઠોડ અને સુખરામ મેઘવાલ તરીકે થઈ છે. પોલીસે ઘટનાસ્થળેથી ઈંગ્લીશ દારૂની બોટલો, મોબાઈલ ફોન અને ગુનામાં વપરાયેલી આઈ-20 કાર મળીને કુલ રૂ.7,11,940નો મુદ્દામાલ કબજે કર્યો છે. બૂટલેગરો દ્વારા દારૂ છુપાવીને હેરાફેરી કરવાનો પ્રયાસ પોલીસની સતર્કતાના કારણે નિષ્ફળ નીવડ્યો છે.

ધ્રાંગધ્રા તાલુકા પોલીસ દ્વારા કાયદેસરની કાર્યવાહી

આ મામલે ધ્રાંગધ્રા તાલુકા પોલીસ સ્ટેશનમાં પ્રોહિબિશન એક્ટ હેઠળ ગુનો નોંધીને કાયદેસરની તપાસ હાથ ધરવામાં આવી છે. દારૂનો આ જથ્થો રાજસ્થાનથી ક્યાં પહોંચાડવાનો હતો અને આ નેટવર્કમાં અન્ય કયા સ્થાનિક બૂટલેગરો સંડોવાયેલા છે, તે દિશામાં પોલીસે આરોપીઓની કડક પૂછપરછ શરૂ કરી છે. ધ્રાંગધ્રા તાલુકા પોલીસ સર્વેલન્સ ટીમની આ સફળ કામગીરીથી અસામાજિક તત્વો અને દારૂનું નેટવર્ક ચલાવતા બૂટલેગરોમાં ભારે ફાફડાટ વ્યાપી ગયો છે.

ગુજરાતના વધુ સમાચાર વાંચવા માટે ક્લિક કરો