calendar_todayOctober 26, 2026
Surendranagar: PGVCLની 31 ટીમોના સામૂહિક દરોડામાં ₹20.30 લાખની વીજ ચોરી પકડાઈ
પશ્ચિમ ગુજરાત વિજ કંપની લિમિટેડ (PGVCL) દ્વારા સુરેન્દ્રનગર જિલ્લામાં ગેરકાયદે વીજ વપરાશ અને વીજ ચોરી કરતા તત્વો સામે આક્રમક ઝુંબેશ તેજ કરવામાં આવી છે. પીજીવીસીએલ સુરેન્દ્રનગર વર્તુળ કચેરી હેઠળ એન્જિનિયરો અને તકનીકી સ્ટાફની ખાસ 31 અલગ-અલગ ફ્લાઈંગ ટીમો બનાવીને ગ્રામ્ય તેમજ અર્ધ-શહેરી વિસ્તારોમાં વ્યાપક દરોડા પાડવામાં આવ્યા હતા. દિવસભર ચાલેલા આ સઘન ચેકિંગ ડ્રાઇવ દરમિયાન વિવિધ જોડાણોમાંથી કુલ રૂપિયા ૨૦.૩૦ લાખની ગેરકાયદે વીજ ચોરી ઝડપી પાડવામાં આવી છે. તંત્રના આ અચાનક ઓપરેશનથી વીજ ચોરી કરતા ઈસમોમાં ભારે નાસભાગ અને ફફડાટ ફેલાઈ ગયો હતો.
નગરા, રામપરા, થાન અને વઢવાણમાં સઘન ચેકિંગ
PGVCL ની ટીમોએ સુરેન્દ્રનગર જિલ્લાના સંવેદનશીલ ગણાતા વિસ્તારો જેવા કે નગરા, રામપરા, થાન અને વઢવાણ સહિતના ગ્રામ્ય અને ઔદ્યોગિક વિસ્તારોને આવરી લીધા હતા.ઘરેલું, વાણિજ્યિક (કમર્શિયલ), ખેતીવાડી અને લઘુ ઉદ્યોગોના વીજ કનેક્શનોનું સ્થળ પર જ ટેકનિકલ પરીક્ષણ કરવામાં આવ્યું હતું.તપાસ દરમિયાન મીટરમાં ગેરરીતિ, મીટર બાયપાસ કરવા, ડાયરેક્ટ વાયરમાં લંગરિયા નાખી વીજળી ખેંચવા સહિતના કેસો સામે આવ્યા હતા.સ્થળ પર જ ગેરકાયદેસર વીજ વાયરો અને સાધનો જપ્ત કરી સંબંધિત વીજ વપરાશકારોને ₹૨૦.૩૦ લાખના દંડના બિલો ફટકારવામાં આવ્યા હતા.
આગામી દિવસોમાં પણ કડક ડ્રાઇવ યથાવત રહેશે
કંપનીના અધિકારીઓ અનુસાર, તહેવારો અને આગામી સિઝનને ધ્યાનમાં રાખીને વીજ લાઈન પરનું લોડિંગ સંતુલિત રાખવા અને કંપનીને થતું આર્થિક નુકસાન અટકાવવા માટે આ પ્રકારના સરપ્રાઈઝ ચેકિંગ સતત ચાલુ રાખવામાં આવશે. નિયમભંગ કરનારાઓ સામે દંડકીય કાર્યવાહી ઉપરાંત જરૂર જણાયે પોલીસ ફરિયાદ દાખલ કરવા સુધીનાં કડક પગલાં પણ લેવામાં આવશે.