Tharad: ઢીમાથી ફંગડી વચ્ચેના 7 કિમીના બિસ્માર માર્ગને નવો બનાવો

નવરચિત વાવ થરાદ જિલ્લાના ધરણીધર તાલુકાના પ્રસિદ્ધ યાત્રાધામ ઢીમા અને આસપાસના ગ્રામ્ય વિસ્તારોના ખેડૂતો તેમજ યાત્રાળુઓની વર્ષો જૂની માર્ગ સુવિધાની સમસ્યાને લઈને ઢીમા અને ફંગડી ગ્રામ પંચાયત દ્વારા મુખ્યમંત્રીને લેખિતમાં રજૂઆત કરી નવો ડામર રોડ મંજૂર કરવાની માંગ કરવામાં આવી છે. ઢીમા પવિત્ર યાત્રાધામથી ફંગડી ગામને જોડતો આશરે 7 કિલોમીટરનો માર્ગ લાંબા સમયથી અત્યંત જર્જરીત અને ધૂળિયો બની ગયો છે.ઢીમા ખાતે વર્ષ દરમિયાન મોટી સંખ્યામાં શ્રદ્ધાળુઓ, સંતો અને પદયાત્રીઓ દર્શનાર્થે આવે છે. આ ઉપરાંત માવસરી, ટોભા, આકોલી અને પાનેસડા સહિતના આસપાસના વિસ્તારોમાંથી ધરણીધર ધામે દર્શનાર્થે આવતા પદયાત્રીઓ તેમજ સ્થાનિક ખેડૂતો આ રસ્તાનો સતત ઉપયોગ કરે છે. યોગ્ય ડામર રોડના અભાવે ચોમાસાની ઋતુમાં રસ્તો બિસ્માર બની જતાં વાહનવ્યવહાર લગભગ ઠપ્પ થઈ જાય છે જેના કારણે ગ્રામજનો અને યાત્રાળુઓને ભારે હાલાકી ભોગવવી પડે છે. ઢીમા ગ્રામ પંચાયત અને ફંગડી ગ્રુપ ગ્રામ પંચાયતના સરપંચ ઓ તથા સ્થાનિક ગ્રામજનો અને ખેડૂતોએ સંયુક્ત રજૂઆત કરતાં જણાવ્યું છે કે નવા બનેલા વાવ-થરાદ જિલ્લાના સર્વાંગી વિકાસ માટે આ કનેક્ટિવિટી અત્યંત મહત્વપૂર્ણ છે. આ 7 કિમીના માર્ગ પર તાત્કાલિક પાકો ડામર રોડ મંજૂર કરવામાં આવે તો યાત્રાળુઓની સુરક્ષા વધશે અને ખેડૂતોને પોતાના માલસામાનની હેરફેર માટે મોટી રાહત મળશે.

ગુજરાતના વધુ સમાચાર વાંચવા માટે ક્લિક કરો