Vadodara : પાંચ મિલી-વોટથી વધુ પાવરની લેસર 10 સેકન્ડમાં રેટિનાને નુકસાન પહોંચાડે

વડોદરા

ગણેશોત્સવની ઉજવણી હવે ભક્તિથી વધુ આડંબર અને ઘોંઘાટ તરફ વળી રહી છે, જેના ગંભીર પરિણામો સામે આવી રહ્યા છે. પાછલા વર્ષોમાં મહારાષ્ટ્રના કોલ્હાપુરમાં ગણેશ વિસર્જન યાત્રા દરમિયાન થયેલા બેફામ લેસર લાઈટના ઉપયોગને કારણે 65 જેટલા લોકોને આંશિક કે સંપૂર્ણ દ્રષ્ટિ ગુમાવવાનો વારો આવ્યો હતો. જેમાં ખાસ કરીને 18 થી 27 વર્ષના યુવાનો હતા. જે ઘટના વડોદરામાં ના બને તેનું ધ્યાન મંડળના સભ્યોએ લેવાની તાતી આવશ્યકતા છે.

જે વિશે માહિતી આપતા ઓપ્થેલ્મોલોજિસ્ટે જણાવ્યું હતું કે, શહેરના ઘણા મંડળોએ વિસર્જન યાત્રામાં હાઈ-પાવર લેસર લાઈટોનો ઉપયોગ કરવા માટે સાઉન્ડ એન્ડ લાઇટ ઓપરેટરોને જાણ કરી જ દીધી છે ત્યારે લેસર સામે ડાન્સ કરવાથી થતા નુકસાન વિશે જાણી લેવું જોઇએ. લેસરની તીવ્ર બીમ સીધી આંખના પડદા પર પડવાથી હોર્મોનલ ચેન્જિસ અને હાઈપોગ્લાયસેમિયા જેવી સ્થિતિ સર્જાય છે. તેનાથી રેટિનામાં બ્લીડીંગ થાય છે. મેડિકલ ભાષામાં તેને સબ-હાયલોઈડ હેમરેજ કહેવાય છે, જેમાં મેક્યુલા પર લોહી જામી જાય છે અને દ્રષ્ટિ જતી રહે છે. તબીબોના મતે 5 મિલી-વોટથી વધુ પાવરની લેસર માત્ર 10 સેકન્ડમાં પણ રેટિનાને કાયમી નુકસાન પહોંચાડી શકે છે. ગત વર્ષે શહેરની વિવિધ હોસ્પિટલોમાં આવા 40 જેટલા આંખોના કેસ નોંધાયા હતા. જેમાંથી મોટા ભાગનાઓને Nd-YAG લેસર સર્જરી કરવી પડી હતી. દર્દીઓને આંખોમાં ડ્રાયનેસ, બળતરા, સોજા, થાક લાગવો અને સતત માથાનો દુઃખાવો જેવા લક્ષણો જોવા મળ્યા હતા. નોંધનીય છે કે, કોલ્હાપુરની ઘટના બાદ કોલ્હાપુર જિલ્લા પ્રશાસને ગણેશ આગમન અને વિસર્જનમાં લેસર લાઈટના ઉપયોગ પર સંપૂર્ણપ્રતિબંધ મૂક્યો છે અને નિયમ તોડનાર 300 મંડળો સામે ફોજદારી કાર્યવાહી કરી હતી. કોલ્હાપુરની જેમ વડોદરામાં પણ ગણેશ વિસર્જન, ગણેશ આગમન અને અન્ય સરઘસોમાં લેસર લાઈટના ઉપયોગ પર તાત્કાલિક પ્રતિબંધ મૂકવામાં આવે તો લોકોની આંખને નુકસાન થતું અટકશે.

ગુજરાતના વધુ સમાચાર વાંચવા માટે ક્લિક કરો